Футбол бўйича Осиё Чемпионлар Лигаси баҳслари 18 сентябрь, душанба куни старт олади.
Бугун Ўзбекистоннинг учта жамоаси: “Насаф”, “Навбаҳор” ва “ОКМК” мусобақадаги иштирокини бошлайди. Учала клуб бош мураббийлари ўйин олдидан матбуот анжуманида иштирок этди.
Бу жуда катта турнир. Рақиб жамоасининг ўйинларини ўрганиб чиқдик. Улар ҳужумкор ўйин намойиш қилади. “Насаф”нинг мусобақадаги асосий мақсади ўтган йилгидек гуруҳдан чиқиб, имкон қадар узоқроқ босқичга бориш.
Рўзиқул Бердиев, “Насаф” бош мураббийи
Қаршининг “Насаф” жамоаси “Ал-Файсали”га қарши баҳс олиб боради. Учрашув 21:00 да старт олади.
Жамоамиз Осиё Чемпионлар Лигаси (ОЧЛ) гуруҳ баҳслари доирасидаги илк баҳсда майдонга тушади. Очиғини айтиш керак, мазкур нуфузли мусобақанинг гуруҳ баҳслари қуръаси олдидан биз шундай даражадаги рақибга қарши ўйнашни хоҳлагандик.
Яна шуни ҳам таъкидламоқчиманки, биз эртага Осиёнинг энг кучли жамоасига қарши ўйнаймиз. Саудия Арабистони футболида юз бераётган ислоҳотлар самараси ўлароқ, “Ал-Ҳилол”нинг ҳар бир чизиғида топ футболчилар жамланишган, таркибидан замонавий футболимиз юлдузлари ўрин олишган.
Хўш, кучли рақибга қарши қандай ўйин намойиш этиш керак? Бунинг учун футболчилардан аввало, юқори савияли ўйин, интизомга бўйсуниш ва фидойилик талаб этилади. Шунингдек, бир оз омад ҳам керак.
“Ал-Ҳилол” сингари кучли клубга қарши кечадиган эртанги ўйинда мўжизага ҳам умид қиламиз.
ОЧЛ гуруҳ баҳсларида юртимиз шарафини ҳимоя қиладиган “Навбаҳор” билан ижобий натижага эришишни жудаям хоҳлаймиз ва клуб билан ОЧЛ мусобақасида ҳам ўз олдига қўйилган вазифани бажариши учун қўлимиздан келганича ҳаракат қиламиз.
Самвел Бабаян, “Навбаҳор” бош мураббийи
“Навбаҳор” клубининг “Ал-Ҳилол”га қарши баҳси 23:00 да старт олади.
Мен қўрқадиган ёшдан ўтганман. “Ал-Иттиҳод”ни бошқа рақибларимиз сингари ҳурмат қиламиз. Ўйлайманки, чиройли ўйинга гувоҳ бўламиз.
Миржалол Қосимов, “ОКМК” бош мураббийи
“ОКМК” ва “Ал-Иттиҳод” ўртасидаги баҳс 21:00 да старт олади.
Изоҳ (0)