“Ko‘z nuri” klinikalar tarmog‘i bosh shifokor Hikmatullo Sodiqovning “Daryo” muxbiriga bergan intervyusida aytishicha, tibbiyot uskunalarni dilerdan emas, chet eldagi ishlab chiqaruvchining o‘zidan to‘g‘ridan to‘g‘ri sotib olishni yo‘lga qo‘yish kerak.
Shifokorning taʼkidlashicha, bugungi kunda xususiy tibbiyot muassasalarga soliq va bojxona imtiyozlari berilgani xizmat ko‘rsatish narxlarni pasayishiga olib kelgan.
“Bizda bir muammo bor, bunga mutasaddilar ko‘mak bersa yaxshi bo‘lar edi. Yaʼni agar biz Germaniya, AQSH yoki Yaponiyadan uskuna sotib olmoqchi bo‘lsak ishlab chiqaruvchining o‘zidan emas faqat ularning dilerlaridan olishga majburmiz.
Bu uskuna narxlarni bir necha barobar oshgan holda xarid qilishimzga to‘g‘ri kelmoqda. Aniqki, bu xizmat ko‘rsatish narxlarining ortishiga olib kelmoqda. Masalan, ko‘zni lazer korreksiyasi bilan davolovchi uskuna hamma ko‘z kasalliklari shifoxonalarida yo‘q. Chunki uni sotib olish qimmat”, — dedi Hikmatullo Sodiqov.
Shifokorning qo‘shimcha qilishicha, chet eldan qaysi ishlab chiqaruvchiga uskuna sotib olish uchun murojaat qilinsa, hammasi O‘zbekistondagi dilerga uchrashishimizni aytishadi va bu bizga qimmatga tushmoqda.
Maʼlumot uchun, xususiy tibbiyotni qo‘llab-quvvatlash tizimi yo‘lga qo‘yildi. Misol uchun, bugungi kunda nodavlat tibbiyot tashkilotlari tomonidan 2025-yil 1-yanvarga qadar qator imtiyozlar berilgan.
Jumladan:
- o‘z ehtiyojlari uchun respublika hududiga olib kiriladigan yangi tez tibbiy yordam avtomobillari import bojxona bojidan ozod qilingan;
- olib kelinadigan yangi tibbiy asbob–uskunalar, butlovchi buyumlar va ularning ehtiyot qismlari hamda sarflash materiallari uchun bojxona imtiyozlari mavjud;
- sarflash materiallarini O‘zbekiston Respublikasi hududiga olib kirishda qo‘shilgan qiymat solig‘idan ozod qilindi;
- xususiy tibbiyot muassasalari barcha soliq to‘lovlaridan ozod qilingan.
Izoh (0)