“Чет элда ишлаб чиқарилган тиббий техникаларни дилерлардан сотиб олиш қимматга тушмоқда” — мутахассис

“Кўз нури” клиникалар тармоғи бош шифокор Ҳикматулло Содиқовнинг “Дарё” мухбирига берган интервьюсида айтишича, тиббиёт ускуналарни дилердан эмас, чет элдаги ишлаб чиқарувчининг ўзидан тўғридан тўғри сотиб олишни йўлга қўйиш керак.

Шифокорнинг таъкидлашича, бугунги кунда хусусий тиббиёт муассасаларга солиқ ва божхона имтиёзлари берилгани хизмат кўрсатиш нархларни пасайишига олиб келган.

“Бизда бир муаммо бор, бунга мутасаддилар кўмак берса яхши бўлар эди. Яъни агар биз Германия, АҚШ ёки Япониядан ускуна сотиб олмоқчи бўлсак ишлаб чиқарувчининг ўзидан эмас фақат уларнинг дилерларидан олишга мажбурмиз.

Бу ускуна нархларни бир неча баробар ошган ҳолда харид қилишимзга тўғри келмоқда. Аниқки, бу хизмат кўрсатиш нархларининг ортишига олиб келмоқда. Масалан, кўзни лазер коррексияси билан даволовчи ускуна ҳамма кўз касалликлари шифохоналарида йўқ. Чунки уни сотиб олиш қиммат”, — деди Ҳикматулло Содиқов.

Шифокорнинг қўшимча қилишича, чет элдан қайси ишлаб чиқарувчига ускуна сотиб олиш учун мурожаат қилинса, ҳаммаси Ўзбекистондаги дилерга учрашишимизни айтишади ва бу бизга қимматга тушмоқда.

Маълумот учун, хусусий тиббиётни қўллаб-қувватлаш тизими йўлга қўйилди. Мисол учун, бугунги кунда нодавлат тиббиёт ташкилотлари томонидан 2025 йил 1 январга қадар қатор имтиёзлар берилган.

Жумладан:

• ўз эҳтиёжлари учун республика ҳудудига олиб кириладиган янги тез тиббий ёрдам автомобиллари импорт божхона божидан озод қилинган;
• олиб келинадиган янги тиббий асбоб–ускуналар, бутловчи буюмлар ва уларнинг эҳтиёт қисмлари ҳамда сарфлаш материаллари учун божхона имтиёзлари мавжуд;
• сарфлаш материалларини Ўзбекистон Республикаси ҳудудига олиб киришда қўшилган қиймат солиғидан озод қилинди;
• хусусий тиббиёт муассасалари барча солиқ тўловларидан озод қилинган.