O‘zbekiston tashqi ishlar vaziri Baxtiyor Saidov boshchiligidagi delegatsiya 3-7-sentabr kunlari tashrif bilan AQSHda bo‘ldi. Bu haqda TIV matbuot xizmati xabar berdi.
![](/static/2023/05/Fozilbek/photo_2023-09-08_15-41-27.jpg)
Qayd etilishicha, O‘zbekiston tashqi ishlar vaziri AQSH prezidentining maxsus yordamchisi Nikolas Berliner, Nyu-York meri Erik Adams, AQSH Senatining Ichki xavfsizlik va hukumat ishlari bo‘yicha qo‘mitasi raisi Gari Piters, Jahon banki vitse-prezidenti Antonella Bassani hamda AQSHning bir qator yetakchi kompaniyalari rahbarlari bilan alohida uchrashuvlar o‘tkazgan.
Muzokaralar chog‘ida turli yo‘nalishlarda ikki tomonlama hamkorlikni mustahkamlash masalalari muhokama qilingan. Savdo-iqtisodiy va investitsiyaviy hamkorlikni faollashtirishga alohida e’tibor qaratilgan.
Tashrif doirasida axborot-kommunikatsiya sohasidagi hamkorlikni mustahkamlashga qaratilgan O‘zbekiston—Amerika IT-assotsiatsiyasi TechBridge loyihasiga start berilgan.
“IT assotsiatsiyasi #TechBridge loyihasiga start berdik. Barcha yurtdoshlarimizga mazkur istiqbolli sohada ikki mamlakat o‘rtasidagi mavjud ko‘priklarni mustahkamlash va yangilarini barpo etishga qo‘shgan hissalari va kuchli xohish-istaklari uchun tashakkur bildiramiz. Mazkur loyiha kelajakda multiplikativ effekt yaratishiga shubha yo‘q”, — deb yozadi Baxtiyor Saidov o‘zining Telegram dagi sahifasiga.
![](/static/2023/05/Fozilbek/photo_2023-09-08_15-41-32.jpg)
O‘zbekiston delegatsiyasi AQSH Kongressi kutubxonasi binosida O‘zbekiston mustaqilligining 32 yilligiga bag‘ishlangan tantanali tadbirda ham ishtirok etgan.
![](/static/2023/05/Fozilbek/photo_2023-09-08_16-02-11.jpg)
Avgust oxirida O‘zbekiston prezidenti yordamchisi Saida Mirziyoyeva Amerikaning O‘zbekistondagi elchisi bilan AQSHga bo‘lajak tashrif masalalarini muhokama qilgandi.
Eslatib o‘tamiz, AQSH prezidenti Jo Bayden O‘zbekiston rahbari Shavkat Mirziyoyevga 11-avgust kuni maktub yo‘lladi va uni Nyu-Yorkka taklif qilgan edi. Bayden maktubda AQSH va O‘zbekiston o‘rtasidagi strategik sheriklik mustahkamlanayotgani uchun Shavkat Mirziyoyevga minnatdorlik bildirdi, shuningdek, o‘tgan yil davomida mamlakatlar o‘rtasidagi hamkorlik yangi bosqichga ko‘tarilganini qayd etdi.