O‘zbekiston investitsiyalar, sanoat va savdo vaziri Laziz Qudratov AQSHdagi yirik kompaniyalar rahbarlari bilan uchrashuvlar o‘tkazdi. Bu haqda Investitsiyalar, sanoat va savdo vazirligi xabar berdi.
Qayd etilishicha, amaliy tashrif bilan AQSHga borgan investitsiyalar, sanoat va savdo vaziri Laziz Qudratov ushbu mamlakatning Air Products, Exxon Mobil, Abbott, HP, Valmont Industries, General Electric, Caterpillar, US Inc, John Deere va boshqa yirik kompaniyalari rahbariyati bilan uchrashuvlar o‘tkazgan.
Qayd etilishicha, muzokaralar davomida O‘zbekistonda energetika, sog‘liqni saqlash, suv xo‘jaligi, elektronika, tog‘-kon sanoati va qishloq xo‘jaligi uchun yirik texnikalar ishlab chiqarish, geologik-qidiruv ishlarini olib borish va boshqa sohalarda qo‘shma loyihalarni amalga oshirish bo‘yicha kelishuvlarga erishilgan.
Avgust oxirida O‘zbekiston prezidenti yordamchisi Saida Mirziyoyeva Amerikaning O‘zbekistondagi elchisi bilan AQSHga bo‘lajak tashrif masalalarini muhokama qilgandi.
Eslatib o‘tamiz, AQSH prezidenti Jo Bayden O‘zbekiston rahbari Shavkat Mirziyoyevga 11-avgust kuni maktub yo‘lladi va uni Nyu-Yorkka taklif qilgan edi. Bayden maktubda AQSH va O‘zbekiston o‘rtasidagi strategik sheriklik mustahkamlanayotgani uchun Shavkat Mirziyoyevga minnatdorlik bildirdi, shuningdek, o‘tgan yil davomida mamlakatlar o‘rtasidagi hamkorlik yangi bosqichga ko‘tarilganini qayd etdi.
Izoh (0)