Ўзбекистон ташқи ишлар вазири Бахтиёр Саидов бошчилигидаги делегация 3-7 сентябрь кунлари ташриф билан АҚШда бўлди. Бу ҳақда ТИВ матбуот хизмати хабар берди.
Қайд этилишича, Ўзбекистон ташқи ишлар вазири АҚШ президентининг махсус ёрдамчиси Николас Берлинер, Нью-Йорк мэри Эрик Адамс, АҚШ Сенатининг Ички хавфсизлик ва ҳукумат ишлари бўйича қўмитаси раиси Гари Питерс, Жаҳон банки вице-президенти Антонелла Бассани ҳамда АҚШнинг бир қатор етакчи компаниялари раҳбарлари билан алоҳида учрашувлар ўтказган.
Музокаралар чоғида турли йўналишларда икки томонлама ҳамкорликни мустаҳкамлаш масалалари муҳокама қилинган. Савдо-иқтисодий ва инвестициявий ҳамкорликни фаоллаштиришга алоҳида эътибор қаратилган.
Ташриф доирасида ахборот-коммуникация соҳасидаги ҳамкорликни мустаҳкамлашга қаратилган Ўзбекистон—Америка IT-ассоциацияси TechBridge лойиҳасига старт берилган.
“IT ассоциацияси #TechBridge лойиҳасига старт бердик. Барча юртдошларимизга мазкур истиқболли соҳада икки мамлакат ўртасидаги мавжуд кўприкларни мустаҳкамлаш ва янгиларини барпо этишга қўшган ҳиссалари ва кучли хоҳиш-истаклари учун ташаккур билдирамиз. Мазкур лойиҳа келажакда мультипликатив эффект яратишига шубҳа йўқ”, — деб ёзади Бахтиёр Саидов ўзининг Telegram даги саҳифасига.
Ўзбекистон делегацияси АҚШ Конгресси кутубхонаси биносида Ўзбекистон мустақиллигининг 32 йиллигига бағишланган тантанали тадбирда ҳам иштирок этган.
Август охирида Ўзбекистон президенти ёрдамчиси Саида Мирзиёева Американинг Ўзбекистондаги элчиси билан АҚШга бўлажак ташриф масалаларини муҳокама қилганди.
Эслатиб ўтамиз, АҚШ президенти Жо Байден Ўзбекистон раҳбари Шавкат Мирзиёевга 11 август куни мактуб йўллади ва уни Нью-Йоркка таклиф қилган эди. Байден мактубда АҚШ ва Ўзбекистон ўртасидаги стратегик шериклик мустаҳкамланаётгани учун Шавкат Мирзиёевга миннатдорлик билдирди, шунингдек, ўтган йил давомида мамлакатлар ўртасидаги ҳамкорлик янги босқичга кўтарилганини қайд этди.
Изоҳ (0)