Gabondagi harbiy isyon tashkilotchilari hokimiyatdan ag‘darilgan prezident Ali Bongo Ondimbaga mamlakatni tark etishga ruxsat berdi. Bu haqda davlat to‘ntarishiga boshchilik qilgan general Bris Oligi Nguemaga tayanib, AFP xabar berdi.
“U harakatlanish erkinligiga ega. Xohlasa, xorijga ham ketishi mumkin”, — dedi general.
Polkovnik Ulrix Manfumbining qo‘shimcha qilishicha, qaror Ali Bongo Ondimbaning salomatligi holatini hisobga olgan holda qabul qilingan. Agar u tibbiy ko‘rikdan o‘tishni xohlasa, ketishga ruxsat beriladi.
Gabonning hokimiyatdan ag‘darilgan prezidenti 2018-yil oktabr oyida insultga chalingan. Oqibatda uning jismoniy holati yomonlashgan, o‘ng oyog‘i va qo‘lini harakatlantirishda qiynaladi.
Avgust oyida Gabonda prezidentlik saylovlari bo‘lib o‘tdi, natijada 64 yoshli Ali Bongo Ondimba uchinchi bor g‘alaba qozondi. 30-avgust kuni harbiylar hokimiyatni egallab olganini e’lon qildi va Ondimbani uy qamog‘iga oldi. 4-sentabr kuni Bris Oligi Nguema mamlakat prezidenti sifatida qasamyod keltirdi.
Nigerdagi harbiy to‘ntarish
26-iyul kuni Afrikaning yana bir davlati — Nigerda harbiy to‘ntarish sodir bo‘ldi. Prezident gvardiyasi davlat rahbari Muhammad Bazumni hokimiyatdan chetlatdi. Ikki kundan so‘ng prezident gvardiyasi boshlig‘i general Abdurahmon Tchiani o‘zini yangi davlat rahbari deb e’lon qildi.
G‘arbiy Afrika davlatlari iqtisodiy hamjamiyati (ECOWAS) mamlakatlari Nigerga harbiylarni kiritishga tayyorligini e’lon qildi. Bunga javoban davlat to‘ntarishlari natijasida hokimiyatga kelgan harbiylar boshqaruvidagi yana ikki Afrika davlati — Mali va Burkina-Faso “Niger ishlariga har qanday harbiy aralashuv ularga qarshi urush eʼlon qilish bilan barobar bo‘lishini” bildirdi.
Izoh (0)