Габондаги ҳарбий исён ташкилотчилари ҳокимиятдан ағдарилган президент Али Бонго Ондимбага мамлакатни тарк этишга рухсат берди. Бу ҳақда давлат тўнтаришига бошчилик қилган генерал Брис Олиги Нгуэмага таяниб, AFP хабар берди.
“У ҳаракатланиш эркинлигига эга. Хоҳласа, хорижга ҳам кетиши мумкин”, — деди генерал.
Полковник Улрих Манфумбининг қўшимча қилишича, қарор Али Бонго Ондимбанинг саломатлиги ҳолатини ҳисобга олган ҳолда қабул қилинган. Агар у тиббий кўрикдан ўтишни хоҳласа, кетишга рухсат берилади.
Габоннинг ҳокимиятдан ағдарилган президенти 2018 йил октябрь ойида инсультга чалинган. Оқибатда унинг жисмоний ҳолати ёмонлашган, ўнг оёғи ва қўлини ҳаракатлантиришда қийналади.
Август ойида Габонда президентлик сайловлари бўлиб ўтди, натижада 64 ёшли Али Бонго Ондимба учинчи бор ғалаба қозонди. 30 август куни ҳарбийлар ҳокимиятни эгаллаб олганини эълон қилди ва Ондимбани уй қамоғига олди. 4 сентябрь куни Брис Олиги Нгуэма мамлакат президенти сифатида қасамёд келтирди.
Нигердаги ҳарбий тўнтариш
26 июль куни Африканинг яна бир давлати — Нигерда ҳарбий тўнтариш содир бўлди. Президент гвардияси давлат раҳбари Муҳаммад Базумни ҳокимиятдан четлатди. Икки кундан сўнг президент гвардияси бошлиғи генерал Абдураҳмон Тчиани ўзини янги давлат раҳбари деб эълон қилди.
Ғарбий Африка давлатлари иқтисодий ҳамжамияти (ECOWAS) мамлакатлари Нигерга ҳарбийларни киритишга тайёрлигини эълон қилди. Бунга жавобан давлат тўнтаришлари натижасида ҳокимиятга келган ҳарбийлар бошқарувидаги яна икки Африка давлати — Мали ва Буркина-Фасо “Нигер ишларига ҳар қандай ҳарбий аралашув уларга қарши уруш эълон қилиш билан баробар бўлишини” билдирди.
Изоҳ (0)