Hukumat qarori bilan Naslchilik xo‘jaligi maqomini berish bo‘yicha davlat xizmatlari ko‘rsatishning maʼmuriy reglamenti tasdiqlandi. Bu haqda Telegram’dagi “Huquqiy axborot” kanali xabar berdi.
Reglamentga ko‘ra, naslchilik xo‘jaligi maqomi talabgorning murojaatida ko‘rsatilgan muayyan toifaga mansub zotdagi chorva hayvonlari (yovvoyi va xonaki hayvonlar, shuningdek, parrandalar, baliqlar, muayyan hayvonlar hamda asalarilar) turiga yoki faoliyat yo‘nalishiga qarab beriladi.
Talabgor yoki uning vakili davlat xizmatidan foydalanish uchun Davlat xizmatlari markaziga o‘zi kelib murojaat qiladi yoki YIDXP (my.gov.uz)da ro‘yxatdan o‘tadi.
So‘rovnoma to‘ldirilib, unga quyidagilar ilova qilinadi:
- naslchilik zavodi, naslchilik xo‘jaligi, genofoid xo‘jaligi maqomini olishga talabgorlar uchun – so‘nggi 3 yilda o‘tkazilgan naslli mahsulotlar (materiallar) bonitirovkasi natijalari bo‘yicha maʼlumotnomalar nusxasi;
- nasldor chorva hayvonlarining identifikatsiya qilinganligi to‘g‘risidagi maʼlumot;
- tegishli chorva hayvonlari turlari bo‘yicha naslchilik xo‘jaligi maqomini olish uchun minimal talablarga muvofiqligi bo‘yicha talabgor tomonidan tasdiqlangan maʼlumotlar.
Davlat xizmati ko‘rsatganlik uchun BHMning 2 baravari (660 ming so‘m) miqdorida yig‘im undiriladi. YIDXP orqali murojaat etilganda mazkur miqdor 594 ming so‘mni tashkil etadi.
Vakolatli organ so‘rovnomadagi maʼlumotlarning to‘g‘riligini aniqlash uchun 10 ish kuni ichida joyiga chiqqan holda o‘rganadi. Shuningdek, o‘rganish vaqtida tumanlar (shaharlar) veterinariya bo‘limlari orqali talabgorning epizootik barqarorligi, veterinariya-sanitariya qoidalari va normalari ham o‘rganiladi.
Naslchilik xo‘jaligi maqomi berilganligi to‘g‘risidagi guvohnoma 5 yil muddatga beriladi. Guvohnoma olgan shaxs uni boshqa shaxsga foydalanish uchun berishi mumkin emas.
Davlat xizmatlarini ko‘rsatishdagi qulayliklar
So‘nggi yillarda davlat xizmatlarini ko‘rsatish jarayonida 73 turdagi hujjat va maʼlumotnomalarning aholidan talab qilinishi bekor qilindi. Shuningdek, 200 dan ortiq tartib-taomillar soddalashtirildi.
Davlat xizmatlarini ko‘rsatishda talab etiladigan hujjatlar soni 221 tadan 95 taga – 43 foizga qisqartirilgan. Birgina 73 turdagi hujjatlarning qisqartirilishi natijasida yiliga o‘rtacha 20 million aholiga qulaylik yaratildi. Ularning 300 milliard so‘mdan ortiq mablag‘i cho‘ntagida qoldi.
Izoh (0)