Toshkent harbiy okrugida harbiy xizmatchilar bilan “Har qanday qimor bu — tuzoq” mavzusida davra suhbati o‘tkazildi. Bu haqda Mudofaa vazirligi xabar berdi.
Maʼlum qilinishicha, tadbirda harbiylarga onlayn qimor o‘yinlariga berilmaslik kerakligi tushuntirilgan.
“Milliy urf-odatlarimiz, mentalitet va diniy qarashlarimizga yot bo‘lgan qimor o‘yinlarini noqonuniy ravishda tashkil etish holatlari, ayniqsa, onlayn tarzda ommalashib, o‘smir va yoshlarni o‘z domiga tortayotgani achinarli holatlardan biridir. Hattoki bunday o‘yinlarda ko‘p miqdordagi pulini yutqazib qo‘yib, oxir-oqibat o‘z joniga qasd qilish yoki yutqazib qo‘ygan pulini to‘lash uchun jinoyat sodir qilish holatlari ham yuz bermoqda.
Taʼkidlash joizki, bugungi kunda respublikamizda totalizator va bukmekerlik faoliyatini amalga oshirish va albatta, bunday xizmatlarni reklama qilish noqonuniy hisoblanadi. Harbiy xizmatchilar bilan o‘tkazilgan uchrashuvda ham bu kabi onlayn qimor o‘yinlariga berilmaslik, ularning fojiali oqibatlari haqida fikr bildirildi”, —deyiladi xabarda.
Vazirlik xabariga ko‘ra, harbiy xizmatchilarning ogohligini oshirish, komandir va boshliqlar tomonidan o‘z qo‘l ostidagi bo‘ysinuvchilarining bo‘sh vaqtlaridan unumli foydalanishi ustidan muntazam nazorat olib borishi yuqoridagi kabi salbiy illatlar tarqalishiga chek qo‘yadi.
Izoh (0)