Samarqand davlat universiteti Kattaqo‘rg‘on filialida faollar zalida o‘tkazilayotgan tadbir vaqtida binoning beton plitasi qulab tushgani bo‘yicha jinoyat ishi qo‘zg‘atildi. Bu haqda “Daryo”ga Bosh prokuratura axborot xizmati rahbari Hayot Shamsutdinov xabar berdi.
Ma’lum qilinishicha, jinoyat ishi Jinoyat kodeksining 258-moddasi (tog‘-kon, qurilish yoki portlatish ishlari xavfsizligi qoidalarini buzish) bilan qo‘zg‘atilgan.
Voqea 4-sentabr kuni sodir bo‘lgandi. Samarqand davlat universitetining Kattaqo‘rg‘on filiali binosidagi (sobiq litsey binosi) faollar zali shiftidagi beton plita nomaʼlum sabablarga ko‘ra qulab tushgan.
Dastlabki olingan ma’lumotlarda hodisa oqibatida ikki nafar talaba tan jarohati olgani aytilgandi. Keyinroq Bosh prokuratura axborot xizmati rahbari 6 nafar talaba qiz tan jarohati olganini ma’lum qildi.
Hozirda binoning qurilishi hamda mukammal ta’mirlanishi holati mutaxassislar jalb qilingan holda o‘rganilmoqda.
Universitet ma’muriyati bergan ma’lumotga ko‘ra, Samarqand davlat universiteti Kattaqo‘rg‘on filialining Kattaqo‘rg‘on shahar Amir Temur ko‘chasida joylashgan o‘quv binosi sobiq Samarqand davlat chet tillari instituti akademik litseyi binosi uchun qurilgan bo‘lib, 2008-yilda foydalanishga topshirilgan.
2008—2018-yillarda SamDCHTI qoshidagi akademik litsey sifatida, 2019—2021-yillar davomida Kattaqo‘rg‘on shahar 7-maktabi faoliyat olib borgan.
2021-yilda Samarqand davlat universiteti Kattaqo‘rg‘on filiali tashkil etilishi munosabati bilan mazkur bino filial balansiga o‘tkazilgan.
Izoh (0)