Самарқанд давлат университети Каттақўрғон филиалида фаоллар залида ўтказилаётган тадбир вақтида бинонинг бетон плитаси қулаб тушгани бўйича жиноят иши қўзғатилди. Бу ҳақда “Дарё”га Бош прокуратура ахборот хизмати раҳбари Ҳаёт Шамсутдинов хабар берди.
Маълум қилинишича, жиноят иши Жиноят кодексининг 258-моддаси (тоғ-кон, қурилиш ёки портлатиш ишлари хавфсизлиги қоидаларини бузиш) билан қўзғатилган.
Воқеа 4 сентябрь куни содир бўлганди. Самарқанд давлат университетининг Каттақўрғон филиали биносидаги (собиқ лицей биноси) фаоллар зали шифтидаги бетон плита номаълум сабабларга кўра қулаб тушган.
Дастлабки олинган маълумотларда ҳодиса оқибатида икки нафар талаба тан жароҳати олгани айтилганди. Кейинроқ Бош прокуратура ахборот хизмати раҳбари 6 нафар талаба қиз тан жароҳати олганини маълум қилди.
Ҳозирда бинонинг қурилиши ҳамда мукаммал таъмирланиши ҳолати мутахассислар жалб қилинган ҳолда ўрганилмоқда.
Университет маъмурияти берган маълумотга кўра, Самарқанд давлат университети Каттақўрғон филиалининг Каттақўрғон шаҳар Амир Темур кўчасида жойлашган ўқув биноси собиқ Самарқанд давлат чет тиллари институти академик лицейи биноси учун қурилган бўлиб, 2008 йилда фойдаланишга топширилган.
2008—2018 йилларда СамДЧТИ қошидаги академик лицей сифатида, 2019—2021 йиллар давомида Каттақўрғон шаҳар 7-мактаби фаолият олиб борган.
2021 йилда Самарқанд давлат университети Каттақўрғон филиали ташкил этилиши муносабати билан мазкур бино филиал балансига ўтказилган.
Изоҳ (0)