Samarqand davlat universiteti Kattaqo‘rg‘on filialida faollar zalida o‘tkazilayotgan tadbir vaqtida binoning beton plitasi qulab tushgandi. Bosh prokuratura axborot xizmati rahbari Hayot Shamsutdinovning “Daryo”ga ma’lum qilishicha, holat yuzasidan tergovga qadar tekshiruv boshlandi.
“Holat bo‘yicha Kattaqo‘rg‘on shahar prokuraturasi tomonidan tergovga qadar tekshirish harakatlari boshlangan. Tekshirish natijasiga ko‘ra qonuniy qaror qabul qilinadi”, — deb qayd etdi bosh prokuratura axborot xizmati rahbari.
Dastlabki olingan ma’lumotlarga ko‘ra, ikki nafar fuqaro tan jarohati olgan. Hozirda ularga zarur tibbiy yordam ko‘rsatilmoqda.
Voqea 4-sentabr kuni sodir bo‘lgandi. Samarqand davlat universitetining Kattaqo‘rg‘on filiali binosidagi (sobiq litsey binosi) faollar zali shiftidagi beton plita nomaʼlum sabablarga ko‘ra qulab tushgan.
Universitet ma’muriyati axborotiga ko‘ra, soat 9:28 da mazkur binoning faollar zali tomidan, sahna qismining o‘ng burchagidan 1 dona plita talabalar va o‘qituvchi bo‘lmagan joyga tushib ketgan. Natijada ikki nafar 1-kurs talabasi plita bo‘laklarining tegishi natijasida yengil tan jarohati olgan.
Kattaqo‘rg‘on shahar hokimligi bergan ma’lumotga ko‘ra, ayni damda ishchi guruh tomonidan o‘rganish ishlari olib borilmoqda. O‘rganish natijasi yuzasidan qo‘shimcha maʼlumot beriladi.
- Samarqand davlat universiteti Kattaqo‘rg‘on filialining Kattaqo‘rg‘on shahar Amir Temur ko‘chasida joylashgan o‘quv binosi sobiq Samarqand davlat chet tillari instituti akademik litseyi binosi uchun qurilgan bo‘lib, 2008-yilda foydalanishga topshirilgan.
- 2008—2018-yillarda SamDCHTI qoshidagi akademik litsey sifatida, 2019—2021-yillar davomida Kattaqo‘rg‘on shahar 7-maktabi faoliyat olib borgan.
- 2021-yilda Samarqand davlat universiteti Kattaqo‘rg‘on filiali tashkil etilishi munosabati bilan mazkur bino filial balansiga o‘tkazilgan.
Izoh (0)