Bugun, 4-sentabr kuni Samarqand davlat universiteti Kattaqo‘rg‘on filialida faollar zalida o‘tkazilayotgan tadbir vaqtida binoning beton plitasi qulab tushdi.
Kattaqo‘rg‘on shahar hokimligi “ZarNews” mazkur voqeani sodir bo‘lganini tasdiqlagan va holat bo‘yicha ma’lumot bergan.
“Samarqand davlat universitetining Kattaqo‘rg‘on filiali binosidagi (sobiq litsey binosi) faollar zali shiftidagi beton plita nomaʼlum sabablarga ko‘ra joyidan siljib pastga tushgan. Voqea sodir bo‘lgan, yaʼni plita tushgan joyda talabalar bo‘lmaganligi sababli hech kimga jiddiy zarar yetmagan. Faqat zalning birinchi qatorida o‘tirgan ikki nafar 1-bosqich talabalari yengil jarohat olgan va ayni damda shahar Tibbiyot birlashmasida tibbiy yordam ko‘rsatilmoqda. Ayni damda ishchi guruh tomonidan o‘rganish ishlari olib borilmoqda. O‘rganish natijasi yuzasidan qo‘shimcha maʼlumot beriladi”, — deyiladi hokimlik munosabatida.
Sharof Rashidov nomidagi Samarqand davlat universiteti ham holat yuzasidan rasmiy ma’lumot berdi. Qayd etilishicha, soat 9:28 da mazkur binoning faollar zali tomidan, sahna qismining o‘ng burchagidan 1 dona plita talabalar va o‘qituvchi bo‘lmagan joyga tushib ketgan. Natijada 2 nafar 1-kurs talabasi plita bo‘laklarining tegishi natijasida yengil tan jarohati olgan.
Ushbu talabalar Kattaqo‘rg‘on shahar tibbiyot birlashmasiga yetkazilib, birinchi tez tibbiy yordam ko‘rsatilgan.
“Hozirda ushbu talabalarning umumiy ahvoli yaxshi ekanligini maʼlum qilamiz. Shu o‘rinda turli noto‘g‘ri, asossiz maʼlumotlar tarqatish, jamoatchilikda xavotir uyg‘otish maqsadga muvofiq emas deb hisoblaymiz”, — deya ta’kidlanadi universiteti xabarida.
Vazirlar Mahkamasi qaroriga ko‘ra, Samarqand davlat universitetining Kattaqo‘rg‘on filiali 2021-yilda tashkil etilgan. Kattaqo‘rg‘on shahar, Amir Temur ko‘chasi, 27-uy manzilida joylashgan sobiq Samarqand davlat chet tillar instituti huzuridagi 2-son akademik litseyining bino va inshootlari filialga operativ boshqaruv huquqi asosida bepul berilgan.
Binoda 2019-2021-yillar davomida Kattaqo‘rg‘on shahar 7-maktabi faoliyat olib borgan. 2021-yilda Samarqand davlat universiteti Katttaqo‘rg‘on filiali tashkil etilishi munosabati bilan mazkur bino filial balansiga o‘tkazilgan.
Izoh (0)