Футбол бўйича Панама терма жамоаси футболчиси Ҳилберто Эрнандес бандитлар томонидан отиб кетилди ва шифохонада вафот этди.
Воқеа 3 сентябрь куни Панама провинцияси Колонда содир бўлган. Иккита қуролланган эркак такси ичидан туриб, оломонга қарата ўқ узган. Натижада саккиз киши жароҳат олган. Улар ичида футболчи Ҳилберто Эрнандес ҳам бўлган. Шифохонага етказилган футболчи оғир жароҳат туфайли вафот этган.
Жиноятчилар қочишга улгурган. Полиция такси ҳайдовчисини ушлашга муваффақ бўлган. Ҳайдовчининг сўзларига кўра, бандитлар уни 20 минг аҳолиси бўлган Колон провинцияси томонга ҳайдашга мажбурлаган.
4 сентябрь куни Панама полицияси гумондор шахсни қўлга олганини маълум қилди. Жиноятнинг мақсади, Эрнандес асосий нишон бўлгани ёки йўқлиги ҳақидаги тафсилотлар очиқланмаган.
Эрнандес 2023 йилда Панама терма жамоасида дебютини ўтказган ва Лионель Месси билан суратга тушишга улгурганди
26 ёшли Ҳилберто марказий ҳимоя позициясида тўп сурган. Жорий йилнинг март ойида Панама сафида Гватемала (1:1) ҳамда Аргентинага (0:2) қарши баҳсларда майдонга тушган.
Клуб миқёсида эса Эрнандес Панаманинг “Индепенденте” сафида 35 та ўйин ўтказиб, 8 та гол уришга муваффақ бўлган. Клуб ва Панама футбол федерацияси футболчининг оиласига ҳамдардлик билдирди.
Колон — гиёҳванд моддалар контрабандасининг энг яхши йўли. Жиноий тўдалар бу жой учун кураш олиб боради, натижада эса провинцияда жиноят кўпайган
Сўнгги бир неча ойда Колон провинциясида гиёҳванд моддалар контрабандаси авж олган, иккита жиноий гуруҳ энг даромадли йўналишни назорат қилиш учун кураш олиб бормоқда. Жорий йилнинг ўзида у ерда 50 дан ортиқ қотиллик содир этилган.
Марҳум футболчи Эрнандеснинг отаси Колон ёшларини зўравонликни тўхтатишга чақирди ва маҳаллий ҳокимиятни одамларни ҳимоя қилиш учун кўпроқ ишлар олиб боришга ундади. У, шунингдек, жиноятчиларга мурожаат қилиб: “Бошқа зарар етказманг, яхшиси таслим бўлинг”, — деди.
Изоҳ (0)