Samarqand davlat universitetining Kattaqo‘rg‘on filiali tashkil etildi

Vazirlar Mahkamasining qarori bilan Samarqand davlat universitetining Kattaqo‘rg‘on filiali tashkil etildi.

Filialning asosiy vazifalaridan biri hududda pedagogika, iqtisodiyot, transport logistikasi sohalarining rivojlanish istiqbollari va ustuvor vazifalarini hisobga olgan holda professional oliy ma’lumotli kadrlarni tayyorlash hisoblanadi.

Filialda ta’lim faoliyati 2021/2022-o‘quv yilidan boshlanadi.

Filialga talabalarni bakalavriat ta’lim yo‘nalishlari va magistratura mutaxassisliklari bo‘yicha davlat granti va to‘lov-kontrakt asosida teng ulushda qabul qilish soni har yili belgilangan tartibda tasdiqlanadigan respublika OTMga o‘qishga qabul qilish parametrlaridan kelib chiqqan holda belgilanadi.

Filial viloyatning Kattaqo‘rg‘on, Narpay, Paxtachi, Ishtixon va Nurobod tumanlaridagi maktablar, o‘rta maxsus ta’lim muassasalarida o‘qituvchilarga doimiy ravishda ilmiy-metodik yordam ko‘rsatib boradi.

Filialni salohiyatli professor-o‘qituvchilar bilan ta’minlash maqsadida respublikaning yetakchi OTMlarida tegishli sohalar bo‘yicha 2021/2022-o‘quv yilidan magistraturada va 2022-yildan tayanch doktoranturada kadrlarni maqsadli tayyorlash choralari ko‘riladi.

Bundan avval O‘zbekistonda Milliy paralimpiya qo‘mitasi tashkil etilishi, Toshkent viloyatida TATUning filiali tashkil etilishi hamda Qoraqalpog‘iston qishloq xo‘jaligi va agrotexnologiyalar instituti tashkil etilishi haqida xabar berilgandi.