Бугун, 4 сентябрь куни Самарқанд давлат университети Каттақўрғон филиалида фаоллар залида ўтказилаётган тадбир вақтида бинонинг бетон плитаси қулаб тушди.
Каттақўрғон шаҳар ҳокимлиги “ЗарNews” мазкур воқеани содир бўлганини тасдиқлаган ва ҳолат бўйича маълумот берган.
“Самарқанд давлат университетининг Каттақўрғон филиали биносидаги (собиқ лицей биноси) фаоллар зали шифтидаги бетон плита номаълум сабабларга кўра жойидан силжиб пастга тушган. Воқеа содир бўлган, яъни плита тушган жойда талабалар бўлмаганлиги сабабли ҳеч кимга жиддий зарар етмаган. Фақат залнинг биринчи қаторида ўтирган икки нафар 1-босқич талабалари енгил жароҳат олган ва айни дамда шаҳар Тиббиёт бирлашмасида тиббий ёрдам кўрсатилмоқда. Айни дамда ишчи гуруҳ томонидан ўрганиш ишлари олиб борилмоқда. Ўрганиш натижаси юзасидан қўшимча маълумот берилади”, — дейилади ҳокимлик муносабатида.
Шароф Рашидов номидаги Самарқанд давлат университети ҳам ҳолат юзасидан расмий маълумот берди. Қайд этилишича, соат 9:28 да мазкур бинонинг фаоллар зали томидан, саҳна қисмининг ўнг бурчагидан 1 дона плита талабалар ва ўқитувчи бўлмаган жойга тушиб кетган. Натижада 2 нафар 1-курс талабаси плита бўлакларининг тегиши натижасида енгил тан жароҳати олган.
Ушбу талабалар Каттақўрғон шаҳар тиббиёт бирлашмасига етказилиб, биринчи тез тиббий ёрдам кўрсатилган.
“Ҳозирда ушбу талабаларнинг умумий аҳволи яхши эканлигини маълум қиламиз. Шу ўринда турли нотўғри, асоссиз маълумотлар тарқатиш, жамоатчиликда хавотир уйғотиш мақсадга мувофиқ эмас деб ҳисоблаймиз”, — дея таъкидланади университети хабарида.
Вазирлар Маҳкамаси қарорига кўра, Самарқанд давлат университетининг Каттақўрғон филиали 2021 йилда ташкил этилган. Каттақўрғон шаҳар, Амир Темур кўчаси, 27-уй манзилида жойлашган собиқ Самарқанд давлат чет тиллар институти ҳузуридаги 2-сон академик лицейининг бино ва иншоотлари филиалга оператив бошқарув ҳуқуқи асосида бепул берилган.
Бинода 2019-2021 йиллар давомида Каттақўрғон шаҳар 7-мактаби фаолият олиб борган. 2021 йилда Самарқанд давлат университети Катттақўрғон филиали ташкил этилиши муносабати билан мазкур бино филиал балансига ўтказилган.
Изоҳ (0)