“Ko‘chmas mulkka bo‘lgan huquqlarni davlat ro‘yxatidan o‘tkazish vaqtida yuzaga keladigan nizolarni sudga qadar hal qilish tartibi to‘g‘risidagi nizomni tasdiqlash haqida”gi Vazirlar Mahkamasi qarori qabul qilindi.
Hujjatga ko‘ra, ko‘chmas mulkka bo‘lgan huquqlarni davlat ro‘yxatidan o‘tkazishda Davlat kadastrlari palatasi xodimlarining harakatlari (harakatsizligi)dan norozi shaxs tegishli nizolarni ko‘rib chiquvchi Komissiyaga yozma Palata sayti orqali elektron murojaat qilishi mumkin.
Palataning hududiy boshqarmasi boshlig‘i Komissiya raisi hisoblanadi. Komissiya tarkibiga uning o‘rinbosari, shuningdek, quyidagi idoralar hududiy boshqarmalarining vakillari kiradi:
- Qurilish vazirligi;
- Adliya organlari;
- Soliq organlari;
- Advokatlar palatasi.
Murojaatni ko‘rib chiqish muddati – 10 ish kuni. Komissiya qaroridan norozi shaxs qarorni olgan paytdan 2 oy ichida Apellyatsiya komissiyasiga murojaat qilishi mumkin.
Hujjat qonun hujjatlari maʼlumotlari milliy bazasida eʼlon qilingan va 2023-yil 30-avgustdan kuchga kirgan.
Bundan oldin O‘zbekistonda ko‘chmas mulkka bo‘lgan huquqlarni davlat ro‘yxatidan o‘tkazuvchilarning malakasini oshirish tartibi belgilangandi. Ushbu o‘quv kurslarining eng ko‘p hajmi 72 soatni tashkil qiladi. Kurslar tamomlangach, ro‘yxatdan o‘tkazuvchilar test sinovidan o‘tkazilib, testdan muvaffaqiyatli o‘tganlarga sertifikat beriladi.
Izoh (0)