Ўзбекистонда турли ёшдаги болаларда 50 га яқин буйрак кўчириб ўтказиш амалиёти бажарилди. Бу ҳақда Соғлиқни сақлаш вазирлиги матбуот хизмати маълум қилди.
Таъкидланишича, тиббиёт, хусусан, трансплантация соҳасини ривожлантириш ва унинг моддий-техник базасини мустаҳкамлашга қаратилаётган эътибор натижасида буйрак ва жигар кўчириб ўтказиш каби мураккаб амалиётларни Ўзбекистоннинг ўзида бажариш йўлга қўйилди.
“Хусусан, 2017 йилдан академик B.Воҳидов номидаги Республика ихтисослаштирилган хирургия илмий-амалий тиббиёт марказида буйрак трансплантацияси бўйича операциялар муваффақиятли бажариб келинаётган бўлса, 2021 йилдан тиббиётимиз тарихида илк бор маҳаллий мутахассислар томонидан жигар кўчириб ўтказиш йўлга қўйилди.
Натижада юртимизда ушбу ноёб жарроҳлик муолажалари орқали ўз саломатлигини тиклаган беморлар сони 15 баробарга ортиб, йилига 350 тани ташкил қилди. Қолаверса, 2017-2023 йилларда 1 минг 100 та буйрак трансплантацияси ва 70 дан ортиқ жигар трансплантацияси амалга оширилди. Ваҳоланки, бу рақам 2017 йилда атиги 27 тадан иборат эди.
Қўшимча қилинишича, мазкур йўналишда тажриба ва кўникмалар оширилиб, бугунгача турли ёшдаги болаларда 50 га яқин буйрак кўчириб ўтказиш амалиёти бажарилди.
Бундан ташқари, юртимизда инсон органларини кўчириб ўтказиш соҳасида малакали мутахассислар тайёрлаш тизими ҳам самарали йўлга қўйилди. Айни пайтда улар хорижий давлатларда малака ошириб, чет эллик мутахассислар билан қўшма жарроҳлик амалиётларида иштирок этмоқда”, – дейилади вазирлик ахборотида.
Маълумот учун, “Инсон аъзолари ва тўқималарининг трансплантацияси тўғрисида”ги Ўзбекистон Республикаси қонуни қабул қилинган.
Аввалроқ, қарийб 50 турдаги офталмологик касалликларни даволаш йўлга қўйилгани ва фақат республика марказида бажариладиган нейрожарроҳлик амалиётларининг қарийб 40 фоизи эндиликда барча ҳудудларда бажарилаётгани маълум қилинган эди.
Изоҳ (0)