“O‘zsuvta’minot”, “O‘zog‘irsanoatloyiha” va “ToshuyjoyLITI” AJ aksiyalarini boshqarish vakolati Qurilish va uy-joy kommunal xizmat ko‘rsatish vazirligiga o‘tkazildi. Bu haqda Qurilish va uy-joy kommunal xizmat ko‘rsatish vazirligi ma’lum qildi.
“Ma’muriy islohotlar doirasida qurilish va uy-joy kommunal xo‘jaligi sohasida davlat boshqaruvini samarali tashkil qilish chora-tadbirlari to‘g‘risida”gi prezident farmoniga muvofiq, Qurilish va uy-joy kommunal xo‘jaligi vazirligi faoliyatining 8 ta ustuvor yo‘nalishi belgilab berildi.
Shuningdek, vazirlik tizimidagi tashkilotlarni qayta tashkil qilish dasturi ham tasdiqlandi. Unga ko‘ra, Qurilish vazirligi faoliyatini rivojlantirish jamg‘armasi va Uy-joy kommunal xo‘jaligi vazirligini rivojlantirish jamg‘armasi birlashtirilib, yagona jamg‘armaga aylantirildi.
“O‘zsuvta’minot”, “O‘zog‘irsanoatloyiha” va “ToshuyjoyLITI” AJ aksiyalarini boshqarish vakolati Qurilish va uy-joy kommunal xizmat ko‘rsatish vazirligiga o‘tkazildi.
Arxitektura, loyiha faoliyati va qurilish nazorati mutaxassislarini 10 ta faoliyat yo‘nalishi bo‘yicha sertifikatlash tizimi joriy qilinmoqda.
Bundan tashqari, Qurilish va uy-joy kommunal xizmat ko‘rsatish vazirligi huzurida aholi punktlarining shaharsozlik hujjatlarini ishlab chiqish bo‘yicha buyurtmachi funksiyasini bajaradigan hamda Davlat shaharsozlik kadastrini va Shaharsozlik geoaxborot tizimini yuritadigan Urbanizatsiya va shaharsozlik hujjatlarini ishlab chiqish Respublika markazi faoliyati yo‘lga qo‘yilmoqda. Shuningdek, arxitektura, qurilish, muhandislik va kommunal xo‘jaligi sohalarida kadrlar tayyorlash, qayta tayyorlash va malakasini oshirish hamda ularni baholash bo‘yicha ixtisoslashgan davlat oliy taʼlim muassasasi, yaʼni Kompetensiyani rivojlantirish instituti tashkil etilmoqda.
Iyul o‘rtalarida Dilshod Azimov “O‘zsuvta’minot” AJ boshqaruvi raisi vazifasini bajaruvchi etib tayinlangandi. 2022-yil hisobida “O‘zsuvtaʼminot” hamda uning hududiy suv taʼminoti korxonalari tomonidan ichimlik va oqova suv tizimlariga jami 2 240 ta noqonuniy ulanish holatlari aniqlangan bo‘lib, mazkur qonunbuzarliklar natijasida jami 41,5 milliard so‘mlik zarar yetkazilgan.
Izoh (0)