Россия ТИВнинг расмий вакили Мария Захарова Ўзбекистон 26 август куни Россиянинг Белгород вилояти Шебекинский тумани аҳолисига 12 тонна инсонпарварлик ёрдами юборганини маълум қилди.
Қайд этилишича, юкда болалар ва катталар кийим-кечаклари ва пойабзал лари, дори-дармонлар, шунингдек, биринчи синф ўқувчилари учун мактаб тўпламлари мавжуд. Инсонпарварлик ёрдами Ўзбекистоннинг давлат, жамоат ва нодавлат ташкилотлари орқали амалга оширилган.
“Россия томони Ўзбекистон раҳбарияти ва унинг фуқароларига икки мамлакат ўртасидаги мустаҳкам дўстлик анъаналарига, ҳар томонлама стратегик шерикликка асосланган муносабатларнинг юксак даражасини акс эттирувчи ушбу хайрихоҳлик учун чуқур миннатдорлик билдиради”, — дейилади хабарда.
Белгород вилояти ва бошқа чегарадош ҳудудлар Россиянинг Украинага кенг кўламли босқинидан сўнг мунтазам равишда ўққа тутилмоқда. Украинанинг қарши ҳужуми бошланишидан олдин Белгород вилояти чегара ҳудудларини ўққа тутиш сезиларли даражада ошди. Украина томонида жанг қилаётган Россия кўнгиллилар корпуси ва Россия озодлик легиони бўлинмалари Белгород вилоятида бир неча бор рейдлар уюштирди ва чегарадаги аҳоли пунктлари устидан вақтинча назорат ўрнатди.
Бир неча кун олдин нодавлат нотижорат ташкилотлари ва Ўзбекистон бизнес тузилмалари Украинага 10,5 тонна гуманитар ёрдам жўнатган эди. Украинага жами 785 844 гривнага (тахминан 21 282 доллар) қишки пойабзал , спорт, болалар ва аёллар кийимлари юборилган. Шунингдек, умумий қиймати 157 771 гривна (тахминан 4 273 доллар) бўлган тиббий шприслар, тиббий пахта ва инфузион тизимлар жўнатилган.
Изоҳ (0)