Chexiya yaqin kelajakda Ukrainaga jangovar vertolyotlar partiyasini yetkazib berishni rejalashtirmoqda. Shuningdek, chexlar ukrainalik uchuvchilarni Amerikaning F-16 qiruvchi samolyotlarini boshqarishga o‘rgatishda ishtirok etishi mumkin.
Bu haqda respublika mudofaa vaziri Yana Chernoxova YI mudofaa va tashqi ishlar vazirlarining Toledodagi yig‘ilishida ma’lum qildi.
“Biz hozirda (Kiyevga) ko‘proq jangovar vertolyotlar yetkazib berishni rejalashtirmoqdamiz, shuningdek, ukrainalik uchuvchilarni F-16 samolyotlarida uchishga o‘qitishga yordam berish yo‘llarini qidirmoqdamiz”, — dedi u.
Chernoxova Praga Ukrainaga topshirishni rejalashtirayotgan harbiy mashinalarning aniq sonini oshkor qilmadi.
Avvalroq Chexiya Bell kompaniyasi tomonidan ishlab chiqarilgan 12 ta ko‘p maqsadli jangovar vertolyotlarni xarid qilish bo‘yicha AQSH bilan kelishuv tuzgan edi. Ularni sotib olish Chexiya qurolli kuchlariga 17,6 milliard kronga (taxminan 793 million dollar) tushdi.
Izoh (0)