Ukraina elchixonasi o‘zbekistonliklarni urushdan jabr ko‘rgan ayollar va bolalarga yordam ko‘rsatishga chaqirdi

Ukrainaning O‘zbekistondagi elchixonasi o‘zbekistonliklarni urushda jabr ko‘rgan ayollar va bolalarga shoshilinch yordam ko‘rsatishga chaqirdi.

Elchixona Rossiya armiyasining harbiy harakatlari gumanitar falokatga olib kelganini ma’lum qildi. Xususan, millionlab ukrainaliklar qochqinga aylandi va bomba, o‘q otilishidan qutulish uchun o‘z uylarini tark etishga majbur bo‘ldi.

Ukraina elchixonasi barcha o‘zbekistonliklarni Ukrainadagi urushdan jabr ko‘rgan ayollar va bolalarga shoshilinch yordam ko‘rsatishga chaqirmoqda. Shu munosabat bilan, elchixona gumanitar yordam ko‘rsatish uchun O‘zbekiston Milliy bankida maxsus hisob raqam ochganini e’lon qildi.

“Ukrainaning jabrlangan tinch aholisi uchun mablag‘ yig‘ish va ularga insonparvarlik yordamini ko‘rsatish maqsadida Ukraina elchixonasi O‘zbekiston Milliy bankida maxsus hisob raqami ochdi, unga O‘zbekiston fuqarolari va yuridik shaxslari pul mablag‘larini o‘tkazishi mumkin”, — deyiladi elchixona xabarida.