“Odamlarning shukronalik kayfiyatida salbiy o‘zgarishlar bor” — deputat Alisher Qodirov

Oliy Majlis Qonunchilik palatasining navbatdagi yig‘ilishida 2023-yilga mo‘ljallangan davlat dasturining dastlabki yarim yil davomida qanday bajarilgani ko‘rib chiqildi. Muloqotda so‘z olgan “Milliy tiklanish” partiyasi raisi, deputat Alisher Qodirov ijtimoiy himoya bo‘yicha olib borilayotgan davlat siyosati to‘g‘risida fikr bildirdi.

Alisher Qodirovning aytishicha, ijtimoiy himoya tizimida targ‘ibot masalasi oqsamoqda.

“Mamlakatda ijtimoiy ko‘mak bo‘yicha katta davlat siyosati olib borilyapti. Bu biz uchun ustuvor masala. Aholiga yordam berish juda ham to‘g‘ri. Lekin juda ko‘p deputatlarning joylarda olib borayotgan tahlillari shuni ko‘rsatmoqdaki, odamlarning shukronalik kayfiyatida salbiy o‘zgarishlar bor. Odamlar bugun ijtimoiy ko‘makni boshqacha qabul qilyapti. Ko‘mak berish albatta, davlat siyosati. Biroq har bir ijtimoiy yordamning orqasidan targ‘ibot-tashviqot masalalariga jiddiyroq eʼtibor bermasak, aholini boqimanda qilib qo‘yish xavfimiz bor deb o‘ylayman”, — dedi u.

Majlisda Alisher Qodirov oliy taʼlim muassasalariga kirish imtihonlarida ayrim abituriyentlarga berilayotgan imtiyozlarni qayta ko‘rib chiqish kerakligini aytdi.

“O‘quv dargohlariga imtihonlar boshlangan. Jamoatchilikdagi bir masala bizning diqqatimizni tortdi. Imtiyozlar masalasini tahlil qilib chiqishimiz kerak. Chunki bugun imtihonga yaxshi tayyorgarlik ko‘rgan talaba eng yuqori — 189 ballni to‘play olyapti, lekin qo‘shimcha imtiyoz bilan kelgan ayrim taʼlim tashkilotlaridagi yigitlar to‘laligicha davlat grantlarini qamrab olishga erishyapti. Bu 189 ball to‘play olgan abituriyent uchun adolatsizlik bo‘lishi mumkin. Bu yerda imtiyozlar tizimini adolatliroq qilib, balki qaytadan ko‘rib chiqilsa, to‘g‘ri bo‘lardi”, — dedi deputat.

Avvalroq jamoatchilik faollari “Temurbeklar maktabi” bitiruvchilariga harbiy taʼlim muassasalaridagi imtihonlarda o‘z to‘plagan ballarining 30 foizi, boshqa OTMlarda 15 foizi miqdoridagi qo‘shimcha ballar berilishini tanqid qilgandi. “Tizimdagi adolatsizlik sabab oddiy qishloq bolasining o‘rnini zamonaviy sharoitlardagi “Temurbeklar maktabi”da o‘qib, imtiyoz olgan bolalar egallaydi”, — deya fikr bildirgandi faollardan biri.