Yaqinda “Ijtimoiy fikr” jamoatchilik fikrini o‘rganish markazining “Oila va ma’naviyat” mavzuida o‘tkazgan ijtimoiy tadqiqoti yakuniga yetdi. Tadqiqotdan maqsad mamlakatdagi oilalarning barqaror ma’naviy-axloqiy qadriyatlarini, uning jamiyatdagi an’anaviy ijtimoiy tuzilma sifatidagi rivojlanish omillarini aniqlash edi, deb xabar beradi O‘zA.
Aytilishicha, tadqiqotda qatnashganlarning 94,5 foizi davlat oilalarni qo‘llab-quvvatlashga katta e’tibor ko‘rsatayotganini e’tirof etgan.
Tadqiqot jarayonida O‘zbekiston oilalarida axloq shakllanishiga eng ko‘p ta’sir qilishi mumkin bo‘lgan omillar ham o‘rganilgan. O‘zbekiston oilalarining ma’naviy-axloqiy asoslarini shakllantirishda oila (86,7 foiz), mahalla (52,1 foiz), ta’lim muassasalari (48,2 foiz), ijtimoiy muhit (33,9 foiz) va televideniyening (29,4 foiz) ustuvor ta’siri haqidagi fikr bir necha yillik so‘rovlar mobaynida barqaror qolmoqda.
Tadqiqot natijalari oila qurishda axloqiy yo‘nalishlar barqaror ekanini ko‘rsatdi. Masalan, mustaqil va baxtli oila barpo etish shartlarining ko‘rsatkichlari o‘zgarishsiz qolmoqda. Ular orasida er-xotinning o‘zaro ishonchi, bir-biridan rozilik birinchi o‘rinni egallaydi. Ishtirokchilarning fikricha, er-xotinning o‘zaro muhabbati, farzandlar oila barqarorligi va mustaqilligini belgilovchi muhim omildir.
So‘rovning ko‘rsatishicha, aholining mutlaq ko‘pchiligi (96 foiz) o‘z oilasini mustahkam va baxtli deb hisoblaydi.
Shuningdek, tadqiqot aksariyat oilalarda bolalarni yuksak ma’naviy-axloqiy qoidalar ruhida tarbiyalashga katta e’tibor berilayotganini ko‘rsatdi.
Ijtimoiy so‘rov yoshlar o‘rtasida oliy ma’lumot olishga intilish o‘sib borayotganini yana bir bor isbotladi. Tadqiqot fuqarolarning aksariyati farzandlari zamonaviy shaxslar bo‘lib kamolga yetayotganiga qat’iy ishonishini ko‘rsatdi.
Ko‘pchilik oilalar bolalarini jismoniy tarbiyalashga katta e’tibor beradi. Bu yoshlarda jismoniy tarbiya va sportga barqaror qiziqish hamda ehtiyojni shakllantirmoqda. Ishtirokchilar davlatning bolalar sportini va sog‘lom turmush tarzini rivojlantirish strategiyasini faol ma’qullagan. Ularning fikricha, bu “Sog‘lom ona va bola yili” Davlat dasturida yorqin namoyon bo‘lmoqda.
So‘rov ishtirokchilarining mutlaq ko‘pchiligi (96,7 foiz) oilaviy ajrimlarga salbiy munosabat bildirgan. Ularning fikricha, bu bolalarning ta’lim-tarbiyasi va kelajagiga salbiy ta’sir ko‘rsatadi.
“Oila va ma’naviyat” mavzuida o‘tkazilgan ijtimoiy tadqiqot O‘zbekiston aholisi uchun oila asosiy hayotiy qadriyat va yosh avlodni tarbiyalashning muhim omili bo‘lib qolayotganini ko‘rsatdi, deb yakun yasaladi materialga.
Izoh (0)