“Ижтимоий фикр” республика жамоатчилик фикрини ўрганиш маркази томонидан Ўзбекистон фуқаролари ўз ҳаётидан қониқадими, мазмунидаги сўров ўтказилди, дея хабар берди ЎзА.
Фото: “Дарё” / Мадина Нурман
Маълум қилинишича, сўровда қатнашганларнинг 74,1 фоизи ҳаётдан ва ишларнинг ҳозирги ҳолатидан жуда мамнун. Қолган 13,7 фоиз одамлар ҳаётидан қониқишларини айтган. Ҳар ўнинчи респондент “қисман қониқишини” билдирган.
Сўровномада қатнашган ўзбекистонликлар ўзларининг ўтган йилдаги моддий аҳволи ва молиявий ҳолатини баҳолай туриб, фуқароларнинг аксарияти – 66,1 фоизи яхшиланишларни қайд этган. Қолган 27,5 фоиз фуқаролар у аввалгидек яхши даражада қолди деб ҳисоблади.
Ижтимоий сўровнома натижаларига кўра, ўзбекистонликларнинг сиёсий-ижтимоий фаоллиги ҳам ортган. Улар мамлакатнинг сиёсий, иқтисодий ва ижтимоий ривожланиши ҳақида ижобий фикрда ва ўзгаришларни ўз ҳаётида сезаётганини билдирган.
Аввалроқ депутет Алишер Қодиров Олий Мажлис йиғилишида кўп депутатларнинг жойларда олиб борган таҳлиллари натижасида одамларнинг шукроналик кайфиятида салбий ўзгаришлар борлиги аниқланганини айтганди.
«Ижтимоий фикр» маркази 2016 йилда ўтказган сўровда ўзбекистонликларнинг 96 фоизи ўз оиласини мустаҳкам ва бахтли ҳисоблаши келтирилганди. Ташкилотнинг 2017 йилдаги сўровида эса мамлакат аҳолисининг 97,9 фоизи ўзини қонун ҳимоясида деб билиши билдирилган.
Изоҳ (0)