Buxoro viloyat adliya boshqarmasining ko‘magi bilan “G‘ijduvon shashlik” geografik ko‘rsatkich sifatida Adliya vazirligi tomonidan davlat ro‘yxatidan o‘tkazildi. Bu haqda vazirlik matbuot xizmati xabar berdi.
Adliya vazirligi geografik ko‘rsatkichlarni huquqiy jihatdan muhofaza qilish sohasidagi vakolatli davlat organi hisoblanadi. Buxoro viloyat adliya boshqarmasining ko‘magi bilan 24-avgust kuni “G‘ijduvon shashlik” geografik ko‘rsatkich sifatida davlat ro‘yxatidan o‘tkazilgan.
Mazkur geografik ko‘rsatkich guvohnomasi viloyat adliya boshqarmasi boshlig‘ining birinchi o‘rinbosari Sh.Bahronov tomonidan G‘ijduvon tuman hokimi Sherzod Ashurovga tantanali ravishda topshirilgan.
“Qayerga borilsa, hamma restoranlarda “G‘ijduvon shashligi” deb yozishadimi? Endi tuman hokimligining ruxsatisiz u nomni hech kim hech qayerga yozolmaydi. Mabodo G‘ijduvon shashliklari pishiraman desa, albatta, u G‘ijduvonga kelib, hokimiyatdan ruxsat olib, to‘lovini to‘lab, g‘ijduvonliklardan so‘rab, keyin pishiradi, bu — bizning brend”, — deydi Sherzod Ashurov.
Adliya vazirligiga ko‘ra, Buxoro viloyatida birinchi bo‘lib davlat ro‘yxatidan o‘tkazilgan ushbu geografik ko‘rsatkichdan foydalanish huquqini tasdiqlovchi guvohnoma uning egasi, yaʼni G‘ijduvon tuman hokimligiga guvohnomada ko‘rsatilgan tovar turiga nisbatan foydalanish huquqini beradi.
“Muayyan tovarning geografik ko‘rsatkich sifatida davlat ro‘yxatidan o‘tkazilishi jismoniy va yuridik shaxslarga qo‘shimcha majburiyatlarni yuklamaydi, geografik ko‘rsatkichlarni huquqiy jihatdan muhofaza qilish va ulardan foydalanish qonunda belgilangan tartibda amalga oshiriladi”, — deyiladi xabarda.
“Geografik ko‘rsatkichlar to‘g‘risida”gi qonuniga ko‘ra, tovarni muayyan geografik obyekt hududidan kelib chiqqan tovar sifatida identifikatsiyalovchi belgi geografik ko‘rsatkich deb eʼtirof etilib, unda tovarning sifati, nom qozongani yoki boshqa xususiyatlari uning geografik jihatdan kelib chiqishiga sezilarli darajada bog‘liq bo‘ladi.
Izoh (0)