Maktabgacha taʼlim tashkiloti pedagogining kasbiy standartini tasdiqlash to‘g‘risida O‘zbekiston Respublikasi Vazirlar Mahkamasining qarori loyihasi e’lon qilindi.
Unda keltirilishicha, kasbiy standart “Maktabgacha taʼlim va tarbiya to‘g‘risida”gi qonuniga muvofiq pedagogning shaxsiy kasbiy fazilatlari, bilimi, ko‘nikma va malakalariga qo‘yiladigan asosiy talablarini belgilaydi.
Pedagogning kasbiy standarti hududlarning madaniy, demografik va boshqa xususiyatlarini hisobga olgan holda talablar bilan to‘ldirilishi mumkin.
Kasbiy standart bolani rivojlantirish dasturlari, pedagogika va psixologiyasi sohasida to‘plangan tajribadan kelib chiqqan holda quyidagi asosiy tamoyillarga rioya etilishi kerak:
- bolani sifatli parvarish qilish, rivojlantirish va tarbiyalash uchun sharoit yaratish;
- bolaning qiziqishlariga muvofiq bolaga qulaylik yaratish;
- har bir bolaning individualligini hurmat qilish, hamdard bo‘lish, bolaning his-tuyg‘ulari, fikrlari va qadriyatlarini qabul qilish;
- taʼlim-tarbiya jarayonida bolaning rivojlanishini qo‘llab-quvvatlash;
- pedagoglarning inklyuzivlik tamoyillarini qo‘llash huquqiga asoslangan taʼlimga yondashuv;
- sog‘lom muhit yaratuvchi amaliyot va texnologiyalarni qo‘llash;
- bolalar bilan muloqot va ijtimoiy o‘zaro munosabatlarda maktabgacha taʼlim tashkiloti, oila va mahalla hamkorligini yo‘lga qo‘yish.
Pedagog quyidagi ijtimoiy ko‘nikmalar to‘plamiga ega bo‘lishi lozim:
- o‘zi taʼlim olishi;
- analitik va tanqidiy fikrlash;
- tinglash va kuzatish qobiliyati;
- chiqishimlilik, lingvistik qobiliyatlar va turli tillarda muloqot qilish ko‘nikmalari;
- hamkorlik qilishga tayyorlik;
- nizolar va ziddiyatlarni hal qilish qobiliyati.
Belgilangan standartlar talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradi.
Izoh (0)