Toshkentda Kichik halqa yo‘lining bir qismi 5 kunga yopiladi

Toshkent shahridagi Kichik halqa yo‘li ko‘chasining bir qismi 5 kunga yopiladi. Bu haqda poytaxt hokimligi matbuot xizmati xabar berdi.

 

 

Qayd etilishicha, Toshkent shahrida yog‘ingarchilik vaqtida yuzaga kelishi mumkin bo‘lgan suv toshishi holatlarining oldini olish maqsadida ayni kunlarda kollektor-drenaj tizimi quvurlarini yangilash ishlari olib borilmoqda.

Shu bois 30-avgustdan 4-sentabrga qadar Kichik halqa yo‘li ko‘chasining Beshqayrag‘och ko‘chasi bilan kesishmasining pastki tomonidan Istirohat ko‘chasi bilan kesishmasigacha bo‘lgan oralig‘ida joylashgan kollektor quvurlarini ta’mirlash ishlari olib boriladi.

“Shu munosabat bilan Kichik halqa yo‘li ko‘chasining bir qismi (yo‘lning bir tomoni) besh kunga yopiladi. Haydovchilardan noqulayliklar uchun uzr so‘rab, aylanma yo‘llardan foydalanishlarini tavsiya etamiz”, — deyiladi xabarda.

Avvalroq Toshkentda Mustaqillik bayramiga bag‘ishlangan xalqaro ommaviy yugurish musobaqasi sabab ayrim ko‘chalar yopilishi to‘g‘risida xabar berilgandi.