Баъзи блогерлар бу қиммат завод, дейди — Uzbekistan GTL ҳақидаги эътирозлар ўринсиз экани айтилди

“Ўзбекнефтгаз” АЖ 25–26 август кунлари Қашқадарё вилоятига пресс-тур ташкил этди. ОАВ вакиллари “Шўртан” газ конида бўлиб, жамият фаолияти билан боғлиқ саволларига жавоб олди. “Дарё” мухбирининг саволларидан бири “Ўзбекнефтгаз”га қарашли Uzbekistan GTL заводи тўғрисида бўлди.

“Ижтимоий тармоқлардаги баъзи фаоллар GTL заводи фаолияти ва ахборотларини ёпиқ дейишади. Қолаверса, завод қурилиши қимматга тушгани ҳақида ҳам эътирозлар бор. GTL очилгандан бери қай даражада самарадорлик кўрсатяпти”, деган саволга “Ўзбекнефтга” АЖ бошқарув раиси Баҳодир Сиддиқов жавоб берди.

“Бугунги кунда заводда асосан дизель ёнилғиси ишлаб чиқариляпти. Уни ўзимизнинг бозор стандартларини олиш ва маҳсулотни истеъмолчиларга таништиришга бир оз вақтимиз кетди. Мана энди бозор юрди. Ҳозирда захирамиз етарли. Ўзбекистонни дизелга бўлган эҳтиёжини тўлақонли қоплай оламиз. Яъни 1 тонна ҳам импорт қилмасдан мамлакатни дизель маҳсулоти билан қоплашга имкониятимиз бор. Яқинда дизель нархларини ҳам туширдик. Завод дастлабки очилганида дизель нархининг тоннаси 15–16 миллион сўм эди, ҳозир эса 9 миллион 600 минг сўмгача пасайтирилди. Ҳозирги кунда биз импортга ҳам тўлиқ рақобатбардош бўлдик. GTL заводининг лойиҳалаштириш босқичида ўзим қатнашганман. Бундай завод жуда ноёб ҳисобланади. У энг замонавий талабалар асосида қурилган. Баъзи блогерларимиз бу қиммат завод, дейди. Лекин бир нарсани айтмоқчиманки, бу завод “проектний финансирование” асосида қурилган. Бу дегани кредиторлар лойиҳага пул берганда техник, экологик, иқтисодий ва бошқа тарафларини ўрганиб, 100 фоиз кафолат бўлмагунча бир сўм ҳам бермайди. Шунинг учун айрим мутахассисларнинг фикрларига қўшилмайман”, — деди жамият раҳбари.

Баҳодир Сиддиқовнинг айтишича, завод учун қилинган харажатлар 9 йилда ўзини оқлаши режалаштирилган.

“Завод қурилиши учун 10 йиллик кредит олганмиз. Ҳам кредитларини қоплаб, 10 йилнинг ичида оёққа туриб кетиши керак. GTL 2022 йил июнда ишлашни бошлаган. Ҳозир битта линиясида озгина ишлари бор, тўғрилаяпмиз. Заводнинг битта линияси кунига 2 миллион долларли маҳсулот ишлаб чиқаради. Экспорт бозорини ҳам ўрганяпмиз, жуда ҳам яхши нархлар бўлади Худо хоҳласа. Бу жуда тез ўзини оқлайди”,—деди “Ўзбекнефтгаз” АЖ раиси.

Аввалроқ Баҳодир Сиддиқов GTL’да ишлаб чиқарилаётган дизель “Евро–6” стандартларига жавоб беришини, 2022 йилда ушбу маҳсулотдан Тожикистонга 12 000 тонна, жорий йил июлда Эстонияга 1000 тонна сотилганини айтганди. Унинг таъкидлашича, ҳозирда эстонияликлар яна 10 000 тонна, грузияликлар 33 000 тонна, тожиклар 5 000 тонна мазкур маркадаги дизелга буюртма берган.