“O‘zgidromet” sentabr, oktabr va noyabr oylarida respublika bo‘yicha kuzatiladigan ob-havo prognozlarini e’lon qildi.
Sentabr
O‘rtacha oylik havo harorati respublika bo‘yicha meʼyor atrofida, baʼzi joylarda meʼyordan 1-1,5 darajaga yuqori bo‘lib, 18-25 darajani tashkil etadi. Oyning birinchi yarmida harorat asosan kechalari 13-18 daraja, kunduz kunlari 33-38 daraja bo‘ladi.
Oyning ikkinchi yarmida harorat kechalari 13-18 darajadan 8-13 darajagacha, kunduz kunlari 30-35 darajadan 23-28 darajagacha o‘zgarib turadi.
Oylik yog‘ingarchilik miqdori meʼyordan kam, baʼzi joylarda meʼyor atrofida bo‘lishi kutilmoqda (meʼyor 3-8 millimetr, Qoraqalpog‘iston Respublikasi, Xorazm, Buxoro, Navoiy, Qashqadaryo, Surxondaryo viloyatlarida 0,0-2 millimetr, tog‘oldi va tog‘li hududlarda 9-28 millimetrgacha).
Ikkinchi va uchinchi o‘n kunliklarning ayrim kunlari biroz yomg‘ir yog‘ishi mumkin, janubda esa yomg‘ir yog‘ish ehtimoli kam.
Oktabr
O‘rtacha oylik havo harorati respublika bo‘yicha meʼyor atrofida bo‘lib, 10-12 darajani, janubda 16-18 darajani tashkil etadi. Oy davomida harorat kechalari 10-15 daraja iliqdan 3-8 daraja iliqqacha o‘zgarib turadi, oy oxirida 0-2 daraja sovuqqacha bo‘lishi mumkin, kunduz kunlari 23-28 daraja iliqdan 13-18 daraja iliqqacha o‘zgarib turadi.
Shimolda, oy davomida havo harorati kechalari 8-13 daraja iliqdan 1-6 daraja iliqqacha o‘zgarib turadi, 0-3 daraja sovuqqacha bo‘lishi mumkin, kunduz kunlari 12-17 daraja iliqdan 20-25 daraja iliqqacha o‘zgarib turadi.
Oylik yog‘ingarchilik miqdori meʼyor atrofida, baʼzi joylarda meʼyordan ko‘p, shimolda va janubda baʼzi joylarda meʼyordan kam (meʼyor 12-26 millimetr, Qoraqalpog‘iston Respublikasi, Xorazm, Buxoro, Navoiy, Qashqadaryo, Surxondaryo viloyatlarida 3-11 millimetr, tog‘oldi va tog‘li hududlarda 27-70 millimetrgacha).
Noyabr
O‘rtacha oylik havo harorati o‘rtacha ko‘p yillik qiymatlarga yaqin bo‘lib, 2-8 daraja iliqni, janubda 10 daraja iliqqachani tashkil etadi.
O‘zbekiston hududining katta qismida yog‘ingarchilik meʼyorga yaqin bo‘lishi prognoz qilinmoqda, faqat respublikaning janubi-g‘arbida biroz ehtimollik bilan yog‘ingarchilik taqchilligi bo‘lishi kutilmoqda.
Noyabr oyida yog‘ingarchilik meʼyori 37-48 millimetr, Qoraqalpog‘iston Respublikasi, Xorazm, Buxoro, Navoiy, Surxondaryo viloyatlarida va Farg‘ona vodiysi viloyatlarining ayrim joylarida 8-36 millimetr, tog‘oldi va tog‘li hududlarda 65-113 millimetrgacha bo‘ladi .
Izoh (0)