“Чорвачиликда идентификация қилиш тизими ва наслчилик соҳасини такомиллаштиришга оид қўшимча чора-тадбирлар тўғрисида”ги президент қарори қабул қилинди.
Қарорга мувофиқ Қишлоқ хўжалиги вазирлиги ҳамда Иқтисодиёт ва молия вазирлигининг Ветеринария ва чорвачиликни ривожлантириш қўмитаси ҳузурида давлат муассасаси шаклида Ҳайвонларни идентификация қилиш, рўйхатга олиш ва кузатиш марказини ташкил этишга рухсат берилди.
Қарор билан Ветеринария ва чорвачиликни ривожлантириш қўмитасига Тошкент шаҳар Мирзо Улуғбек тумани, “Ижодкор” МФЙда жойлашган Идентификация марказини кўчириш ва жойлаштириш учун хусусий мулк сотиб олиш, таъмирлаш, янги бино ва иншоотлар қуриш ҳамда лаборатория асбоб-ускуналари ва жиҳозларни харид қилиш харажатларини қўмита ҳузуридаги Ветеринария хизмати ва чорвачиликни ривожлантириш жамғармаси ҳисобидан 50 миллион сўмгача миқдорда молиялаштиришга рухсат берилди.
Ветеринария ва чорвачиликни ривожлантириш қўмитасига Идентификация марказини жойлаштириш учун бино ва иншоотларни қуриш ҳамда таъмирлаш ишларини тендерсиз амалга оширишга рухсат берилди.
Шунингдек, қарорга мувофиқ 2023 йил 1 декабрдан бошлаб чорвачилик хўжаликлари ўз эҳтиёжи учун импорт қилган наслдор қорамолларга ҳисобланган қўшимча қиймат солиғини Ветеринария ва чорвачиликни ривожлантириш қўмитаси кафолати асосида 180 кун ичида тўлаб бериш тизими жорий қилинади.
Бундан ташқари, 2023 йил 1 сентябрдан бошлаб, 2025 йил 31 декабрга қадар давлат томонидан чорвачилик маҳсулотларини етиштирувчи хўжаликларга хорижий давлатдан импорт қилинган наслдор қорамолларнинг ҳар бир бошига 2 миллион сўмдан, наслдор қўй ва эчкининг ҳар бир бошига 400 минг сўмдан, паррандачилик хўжаликларига ҳар бир бош бир кунлик наслдор жўжани импорт қилиш билан боғлиқ харажатларнинг 15 минг сўмини қоплаш учун субсидиялар ажратилади.
Эслатиб ўтамиз, “Рақамли Ўзбекистон — 2030” стратегиясини тасдиқлаш ва уни самарали амалга ошириш чора-тадбирлари тўғрисидаги президент фармонига кўра, Ўзбекистонда барча жониворлар (йирик ва майда шохли қорамоллар, чўчқалар, отлар, эшаклар ва туялар, шунингдек, кучук ва мушуклар) босқичма-босқич идентификация қилиниб, ягона электрон ахборот тизимига киритилади.
Ҳайвонларга қулоқ учун бирка (йирик ва майда шохли қорамол, туя ва чўчқаларда), тавро ёки клейма (от ва эшаклар), жетонларда (кучук ва мушуклар) акс эттирилувчи индивидуал рақам берилади. Идентификация олиш шартномага асосан пулли тартибда амалга оширилади.
Изоҳ (0)