Xalq orasida Is’hoqjon domla deb tanilgan Toshkentdagi masjid imom-xatibi Is’hoqjon Begmatovning soliqlar va keshbek haqidagi chiqishi munozaralarga sabab bo‘lgandi. O‘zbekiston musulmonlari idorasi u vazifasidan ozod etilganini ma’lum qildi.
25-avgust kuni Ichki nazorat komissiyasi tomonidan ijtimoiy tarmoqlardagi bir qator chiqishlari keng muhokama qilindi. Komissiya aʼzolari tomonidan imom-xatibning turli bahs-munozaralarga sabab bo‘lgan hissiyotga berilib qilgan keskin chiqishlari, ulamolar fatvolariga nisbatan ayrim teskari fikrlari, ixtilofli masalalarni ko‘tarishi oqibatida, nizo va qarama-qarshiliklarga sabab bo‘lgani qattiq tanqid ostiga olindi.
“Ichki nazorat komissiyasi avval ham ushbu imom-xatibning mana shunday chiqishlarini bir necha bor ko‘rib chiqib, uni jiddiy ogohlantirgan edi. Afsuski, bunday holatlar yana takrorlanishda davom etdi”, — deyiladi idora xabarida.
Is’hoqjon Begmatov ijtimoiy tarmoqlarda muhokamaga sabab bo‘lgan chiqishlarida jiddiy xatoga yo‘l qo‘yganini eʼtirof etdi va pushaymonligini bildirdi.
Ichki nazorat komissiyasi imom-xatib mazkur chiqishlarida ushbu yo‘nalishdagi buyruqlar talablari, ichki tartib-qoidalari hamda mehnat majburiyatlariga muntazam ravishda rioya etmagani uchun Isoqjon Begmatov Toshkent shahridagi “Imom Termiziy” jome masjidi imom-xatibi vazifasidan ozod etildi.
Izoh (0)