Eng ko‘pi Samarqand viloyatida: OTMlarga kirish test sinovidan qancha abituriyent chetlashtirilgani ma’lum qilindi

Bilim va malakalarni baholash agentligi 2023/2024-o‘quv yili uchun test sinovlarida abituriyentlarning ishtiroki haqida ma’lumot berdi.

Unga ko‘ra, bakalavriat ta’lim yo‘nalishlariga kirish test sinovlarida 948 mingdan ortiq abituriyentdan 888 660 nafari ishtirok etdi, 59 831 nafari esa ishtirok etmadi.

Abituriyentlarning 67 nafari hududga kirishda, 148 nafari test sinovi jarayonida tartib-qoidani buzgan uchun test sinovlaridan chetlashtirildi.

Chetlashtirish holatlarining aksariyat qismi taqiqlangan vositalar, jumladan, telefon va shpargalka olib kirish yoki olib kirishga urinish hamda abituriyent o‘rniga boshqa shaxslarning kirishga urinishi bilan bog‘liq.

Test sinovi jarayonida chetlashtirish holatlarining

• 34 tasi (23 foizi) — Samarqand viloyati;
• 31 tasi (20,9 foizi) — Toshkent shahri;
• 20 tasi (13,5 foizi) — Farg‘ona viloyati hissasiga to‘g‘ri keladi.

Eng kam qoidabuzarlik holatlari esa Qoraqalpog‘iston Respublikasi (1 ta) hamda Xorazm, Jizzax va Sirdaryo viloyatlarida (3 tadan) kuzatildi.