АҚШ Давлат департаментининг Терроризмга қарши курашишга кўмаклашиш дастури (АТА) вакиллари Ўзбекистон давлат божхона қўмитасига ташриф буюрди. Бу ҳақда қўмита матбуот хизмати хабар берди.
Учрашувда Божхона қўмитаси раис ўринбосари Нодир Мусамуҳамедов иштирок этган тадбирда қўмита томонидан халқаро терроризмга қарши курашиш, наркотик ва бошқа ноқонуний товарларнинг ҳаракатини олдини олиш бўйича амалга оширилаётган ишлар алоҳида эътироф этилган.
Шу билан бирга, учрашувда АТА дастури томонидан 2024 йилдан бошлаб Ўзбекистоннинг ҳуқуқни муҳофаза қилувчи органлари учун терроризмга қарши курашиш бўйича ҳамкорликда махсус тактик ўқув курслари ўтказилиши режалаштирилгани маълум қилинган.
“Тадбир давомида АТА дастури раҳбари Майкл Твининг билан ҳамкорлик масалалари тўғрисида ўзаро фикр алмашилди”, — дейилади хабарда.
Шавкат Мирзиёев 19 май куни Марказий Осиё—Хитой саммитида махсус хизматлар ўртасида ҳамкорликни йўлга қўйишни таклиф қилганди. “Марказий Осиё давлатлари ва Хитой махсус хизматлари ва ҳуқуқни муҳофаза қилиш идоралари ўртасида уч ёвуз куч, наркотрафик, трансчегаравий ва кибер жиноятчиликка қарши курашда яқин ҳамкорликни йўлга қўйишни таклиф этамиз”, — деган эди давлат раҳбари.
Изоҳ (0)