Afg‘oniston sobiq qiroli Muhammad Zohir Shohga tegishli Mercedes-Benz avtomobili Amerikadagi avtoko‘rgazmada bosh sovrinni qo‘lga kiritdi. Bu haqda Ariana News xabar berdi.
Dastlab Zohir Shohga tegishli bo‘lgan Mercedes-Benz 540 K Special Roadster AQSHda bo‘lib o‘tgan Concours d’Elegance tadbirida “Eng yaxshi shou” unvonini qo‘lga kiritdi.
Ushbu mashina 1937-yil may oyida Afg‘onistonning o‘sha paytdagi qiroli Muhammad Zohir Shoh tomonidan buyurtma qilingan. U sentabr oyida egasiga yetkazib berilgan. Zohir Shoh 1950-yilda uni Britaniyadagi kuyoviga sovg‘a qilgan.
Keyinchalik Mercedes-Benz 540 K Special Roadster amerikalik kolleksionerga sotilgan. Avtomobilning hozirgi egasi amerikalik kollektor Jim Patterson hisoblanadi. U mashinani 2022-yilgi Pebble Beach tadbirida kim oshdi savdosida 9,9 million dollarga sotib olgan.
Pebble Beach Concours d’Elegance — Kaliforniyada har yili o‘tkaziladigan avtomobil tadbiridir. U dunyodagi eng nufuzli avtomobil ko‘rgazmasi hisoblanadi.
Muhammad Zohir Shoh Afg‘onistonda 1933-1973 yillarda 40 yil hukmronlik qilgan.
Izoh (0)