AQSHning Kaliforniya shtati, shuningdek, Meksika hukumati “Xillari” to‘foni yaqinlashishiga hozirlik ko‘rmoqda, deb xabar berdi Associated Press.
“Xillari” yakshanba kuni Kaliforniya yarim oroliga yetib borishi va keyin shimolga qarab harakatlanishi kutilmoqda. Mazkur to‘fon 84 yil ichida Janubiy Kaliforniyaga yopirilgan birinchi tropik to‘fon sifatida tarixga kirishi mumkin.
AQSH Kaliforniyaning katta qismini tropik to‘fondan ogohlantirdi. Los-Anjeles rasmiylari boshpana, kasalxonalar va oziq-ovqat zaxiralarini tayyorlamoqda. Mahalliy sherif departamenti xodimlari uysiz odamlarni qidirmoqda va ularga suv havzalaridan uzoqlashishni maslahat berishmoqda. Mintaqada past tekislikda joylashgan aholi punktlarini himoya qilish maqsadida qum to‘siqlari mustahkamlanmoqda. Shaharlarda, shu jumladan Arizonada, suv toshqini sodir bo‘lganda binolarni himoya qilish uchun qum qoplari tarqatilmoqda.
Joshua Tree milliy bog‘i va Mojave milliy yovvoyi tabiat qo‘riqxonasi yopilgan. SpaceX Kaliforniyaning markaziy qirg‘oqlaridan sun’iy yo‘ldosh uchirilishini kamida dushanba kuniga qadar bekor qildi.
Bir kun avval AQSH prezidenti Jo Bayden Favqulodda vaziyatlarni boshqarish bo‘yicha federal agentlik xodimlarini to‘fon kutilayotgan hududlarga joylashtirgani va kerakli yuklarni mintaqaga olib borganini e’lon qilgan edi.
Izoh (0)