Buyuk Britaniya Mudofaa vazirligi Ukraina havo mudofaasini kuchaytirish uchun 114 million dollar ajratadi. Bu haqda Britaniya Mudofaa vazirligi saytidagi press-relizda ma’lum qilindi.
Ajratilgan mablag‘ga Norvegiyaning Kongsberg mudofaa kompaniyasidan 72,1 million dollarga dronlarga qarshi kurash tizimlari sotib olinadi.
Ikki shartnoma bo‘yicha havo mudofaasi uskunalari — CORTEX Typhon tizimlari sotib olinadi. Ular mashinaga o‘rnatiladi. Ushbu tizimlar yordamida dronlarni aniqlash va ularni yo‘q qilish mumkin bo‘ladi.
Shartnomalar Ukrainaga harbiy yordam ko‘rsatish xalqaro jamg‘armasi mablag‘lari hisobidan moliyalashtiriladi. Umuman olganda, Ukrainaga yordam ko‘rsatish xalqaro jamg‘armasida Daniya, Islandiya, Litva, Norvegiya, Shvetsiya, Niderlandiya va Buyuk Britaniyadan olingan mablag‘lar hisobiga 797 million dollar to‘plangan. Bundan tashqari, Buyuk Britaniya Ukrainaga harbiy yordam uchun 2023-yilda alohida 2,9 milliard dollar ajratgan.
Izoh (0)