Bugungi kunda O‘zbekistonda foydalanishda bo‘lgan traktorlarning 35 foizi eskirgan. Bu haqda “Toshkent traktor zavodi” sotuv bo‘limi boshlig‘i Alisher Almatov “Daryo” muxbiriga bergan intervyusida aytdi.
Alisher Almatovning taʼkidlashicha, yangi traktordan 5-7 yil foydalanilgach, uning sarf–xarajatlari ko‘payadi.
“Hozirda O‘zbekiston aholisi 38 mingta traktordan foydalanmoqda. Shundan 35 foizi eskirgan. Chunki traktordan foydalanish muddati 5-7 yilgacha beriladi. Keyin uning sarf–xarajatlari ko‘payadi. Masalan, moyni va dizelni ko‘proq sarflaydi. Hozir respublikada 15-20 yildan beri foydalanilayotgan traktorlar ham ko‘p”, —dedi zavod xodimi.
“Toshkent traktor zavodi” direktori Azizbek Muhiddinov esa hozir mamlakatda har 1000 gektar yerga 11 dona traktor to‘g‘ri kelishi va bu kamligini aytdi.
“Ko‘p davlatlarda har 1000 gektarga 25 ta traktor bo‘lsa, hosilda unumdorlik yuqori bo‘lmoqda. Biz ham shu maqsadni ko‘zlab intilsak, yiliga 6 000 tadan traktor ishlab chiqarishimiz kerak. Hozir kuniga 4 donadan traktor ishlab chiqaryapmiz. Yerga o‘z vaqtida ishlov berish hosil unumdorligida juda ham muhim”, — dedi u.
Avvalroq Toshkent viloyati Chirchiq shahrida qaytadan tashkil etilgan “Toshkent traktor zavodi”dan reportaj eʼlon qilingandi.
Izoh (0)