Бугунги кунда Ўзбекистонда фойдаланишда бўлган тракторларнинг 35 фоизи эскирган. Бу ҳақда “Тошкент трактор заводи” сотув бўлими бошлиғи Алишер Алматов “Дарё” мухбирига берган интервьюсида айтди.
Алишер Алматовнинг таъкидлашича, янги трактордан 5-7 йил фойдаланилгач, унинг сарф–харажатлари кўпаяди.
“Ҳозирда Ўзбекистон аҳолиси 38 мингта трактордан фойдаланмоқда. Шундан 35 фоизи эскирган. Чунки трактордан фойдаланиш муддати 5-7 йилгача берилади. Кейин унинг сарф–харажатлари кўпаяди. Масалан, мойни ва дизелни кўпроқ сарфлайди. Ҳозир республикада 15-20 йилдан бери фойдаланилаётган тракторлар ҳам кўп”, —деди завод ходими.
“Тошкент трактор заводи” директори Азизбек Муҳиддинов эса ҳозир мамлакатда ҳар 1000 гектар ерга 11 дона трактор тўғри келиши ва бу камлигини айтди.
“Кўп давлатларда ҳар 1000 гектарга 25 та трактор бўлса, ҳосилда унумдорлик юқори бўлмоқда. Биз ҳам шу мақсадни кўзлаб интилсак, йилига 6 000 тадан трактор ишлаб чиқаришимиз керак. Ҳозир кунига 4 донадан трактор ишлаб чиқаряпмиз. Ерга ўз вақтида ишлов бериш ҳосил унумдорлигида жуда ҳам муҳим”, — деди у.
Аввалроқ Тошкент вилояти Чирчиқ шаҳрида қайтадан ташкил этилган “Тошкент трактор заводи”дан репортаж эълон қилинганди.
Изоҳ (0)