Iroq va Suriyadagi “Islom davlati” terrorchilik guruhi saflarida hali ham 5-7 ming nafargacha odam bor, deya xabar bermoqda Associated Press BMT hisobotiga tayanib.
“Mutaxassislarning ta’kidlashicha, ISHIDga qarshi aksilterror operatsiyalariga qaramay, guruhning Iroq va Suriyada hali ham 5-7 ming a’zosi bor, ularning aksariyati jangchilardir. Biroq ISHID e’tiborini yangi jangchilarni yollashga qaratgani uchun hujumlar intensivligini ataylab pasaytirgan”, deb ta’kidlaydi agentlik.
Birlashgan Millatlar Tashkiloti Xavfsizlik Kengashining hisobotidan ma’lum bo‘lishicha, ISHIDning yo‘qotishlari ko‘pligiga, uning Iroq va Suriyadagi faolligi kamayganiga qaramay, vaziyat tarangligicha qolmoqda. Terrorchilar yana o‘z pozitsiyalarini jiddiy ravishda mustahkamlashlari mumkin.
Mutaxassislarning qayd etishicha, Suriya shimoli-sharqida 11 mingga yaqin ISHID jangarilari qamoqqa olingan; ular kurdlar boshchiligidagi Suriya Demokratik kuchlari (SDF) obyektlarida saqlanmoqda. Shuningdek, ushbu mintaqada “Rosh” va “Al-Xol” qochqinlar lagerlari joylashgan bo‘lib, ularda ekspertlarning ma’lumotlariga ko‘ra, ISHIDga aloqador yoki guruh a’zolari bilan oilaviy aloqada bo‘lgan 55 mingga yaqin odam bor.
Ularning uchdan ikki qismi bolalar, jumladan 11,8 ming nafari Iroq fuqarolari, 16 mingga yaqini esa suriyaliklar. Bundan tashqari, 60 dan ortiq turli davlatdan kelgan 6,7 mingdan ortiq odam ham borligi BMT hisobotida ta’kidlangan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)