Ироқ ва Суриядаги “Ислом давлати” террорчилик гуруҳи сафларида ҳали ҳам 5-7 минг нафаргача одам бор, дея хабар бермоқда Associated Press БМТ ҳисоботига таяниб.
“Мутахассисларнинг таъкидлашича, ИШИДга қарши аксилтеррор операцияларига қарамай, гуруҳнинг Ироқ ва Сурияда ҳали ҳам 5-7 минг аъзоси бор, уларнинг аксарияти жангчилардир. Бироқ ИШИД эътиборини янги жангчиларни ёллашга қаратгани учун ҳужумлар интенсивлигини атайлаб пасайтирган”, деб таъкидлайди агентлик.
Бирлашган Миллатлар Ташкилоти Хавфсизлик Кенгашининг ҳисоботидан маълум бўлишича, ИШИДнинг йўқотишлари кўплигига, унинг Ироқ ва Суриядаги фаоллиги камайганига қарамай, вазият таранглигича қолмоқда. Террорчилар яна ўз позицияларини жиддий равишда мустаҳкамлашлари мумкин.
Мутахассисларнинг қайд этишича, Сурия шимоли-шарқида 11 мингга яқин ИШИД жангарилари қамоққа олинган; улар курдлар бошчилигидаги Сурия Демократик кучлари (SDF) объектларида сақланмоқда. Шунингдек, ушбу минтақада “Рош” ва “Ал-Хол” қочқинлар лагерлари жойлашган бўлиб, уларда экспертларнинг маълумотларига кўра, ИШИДга алоқадор ёки гуруҳ аъзолари билан оилавий алоқада бўлган 55 мингга яқин одам бор.
Уларнинг учдан икки қисми болалар, жумладан 11,8 минг нафари Ироқ фуқаролари, 16 мингга яқини эса сурияликлар. Бундан ташқари, 60 дан ортиқ турли давлатдан келган 6,7 мингдан ортиқ одам ҳам борлиги БМТ ҳисоботида таъкидланган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)