Oliy ta’lim muassasalarining iqtidorli talabalari uchun ayrim nomli davlat stipendiyalari joriy etilgani munosabati bilan prezident farmoniga o‘zgartirish kiritildi.
Barcha fanlardan o‘zlashtirish ko‘rsatkichlari “aʼlo” (ko‘pi bilan 25 foizi “yaxshi”) bo‘lgan hamda ijodiy ishda qatnashadigan bakalavriat taʼlim yo‘nalishida o‘qiyotgan oxirgi ikki kurs talabalari uchun quyidagi nomli davlat stipendiyalari taʼsis etildi:
- texnika yo‘nalishlarida — Beruniy,
- tibbiyot yo‘nalishlarida — Ibn Sino,
- gumanitar yo‘nalishlarda — Navoiy,
- tasviriy va amaliy sanʼat hamda dizayn yo‘nalishlarida — Kamoliddin Behzod,
- tabiiy yo‘nalishlarda — Ulug‘bek,
- kinematografiya yo‘nalishida — Xudoybergan Devonov,
- tarix va geografiya yo‘nalishlarida — Bobur,
- jismoniy tarbiya va sport yo‘nalishlarida — Pahlavon Mahmud,
- O‘zbekiston xalqaro islom akademiyasida — Imom al-Buxoriy,
- Qoraqalpog‘iston Respublikasidagi oliy taʼlim muassasalarida — To‘lepbergen Qaipbergenov va Ibroyim Yusupov,
- shuningdek, barcha yo‘nalishlarda — Islom Karimov nomli.
Belgilanishicha,
- Beruniy, Ibn Sino, Navoiy, Kamoliddin Behzod va Ulug‘bek nomli davlat stipendiyalari bakalavriat taʼlim yo‘nalishlari bo‘yicha yuqori kurslarning har ming nafar talabasiga bittadan;
- Imom al-Buxoriy nomli davlat stipendiyasi O‘zbekiston xalqaro islom akademiyasining uch nafar yuqori kurs talabasiga;
- Xudoybergan Devonov nomli davlat stipendiyasi kinematografiya sohasi uchun kadrlar tayyorlovchi har bir oliy taʼlim muassasasining bir nafar yuqori kurs talabasiga;
- Bobur nomli davlat stipendiyasi tarix va geografiya yo‘nalishlari uchun kadrlar tayyorlovchi har bir oliy taʼlim muassasasining bir nafar yuqori kurs talabasiga;
- Pahlavon Mahmud nomli davlat stipendiyasi jismoniy tarbiya va sport yo‘nalishlari uchun kadrlar tayyorlovchi har bir oliy taʼlim muassasasining bir nafar yuqori kurs talabasiga;
- To‘lepbergen Qaipbergenov va Ibroyim Yusupov nomli davlat stipendiyalari Qoraqalpog‘iston Respublikasidagi har bir oliy taʼlim muassasasining bir nafar yuqori kurs talabasiga;
- Islom Karimov nomli davlat stipendiyasi har bir oliy taʼlim muassasasining bir nafar yuqori kurs talabasiga tayinlanadi.
2021-yilda Shavkat Mirziyoyev “Respublika oliy ta’lim muassasalarida tahsil olayotgan, ilmiy-tadqiqot faoliyati bilan shug‘ullanayotgan iqtidorli yoshlarni yanada qo‘llab-quvvatlash to‘g‘risida”gi farmonni imzolagandi. Farmonga ko‘ra, 2021/2022-o‘quv yilidan Prezident davlat stipendiyasi kvotasi tayanch doktoranturada o‘qiyotgan doktorantlar va magistratura bosqichi talabalari uchun 2 barobarga oshirilib, tegishlicha 10 ta va 22 ta etib, bakalavriat bosqichi talabalari uchun esa har bir OTMga bittadan etib belgilangan.
Izoh (0)