Xalqaro ijtimoiy taʼminot assotsiatsiyasi Bosh Assambleyasi O‘zbekiston Iqtisodiyot va moliya vazirligi huzuridagi budjetdan tashqari Pensiya jamg‘armasining tashkilotga aʼzo bo‘lish uchun bergan arizasini tasdiqladi. Bu haqda jamg‘arma matbuot xizmati xabar berdi.
Qayd etilishicha, 1927-yil tashkil etilgan Xalqaro ijtimoiy taʼminot assotsiatsiyasi aholini ijtimoiy himoya qilish sohasida yagona siyosatni amalga oshirish bo‘yicha yetakchi xalqaro tashkilotdir. O‘z doirasiga 160 mamlakatdan 320 ga yaqin milliy ijtimoiy taʼminot institutlarini birlashtiradi. Ijtimoiy sohada qator xalqaro tashkilotlar, birinchi navbatda, Xalqaro mehnat tashkiloti, BMT Iqtisodiy va Ijtimoiy kengashi, Jahon sog‘liqni saqlash tashkiloti va sohaga oid boshqa muassasalar bilan yaqindan hamkorlik qiladi.
Xalqaro ijtimoiy taʼminot assotsiatsiyasiga aʼzolikning ijobiy tomonlari ijtimoiy taʼminotni boshqarishda tan olingan standartlarga kirish va xalqaro ijtimoiy taʼminot assotsiatsiyasiga aʼzo mamlakatlar hududida migrantlarning ijtimoiy himoya taʼminoti sohasidagi huquqlari kafolatini taʼminlashga yo‘naltirilgan.
Shuningdek, Xalqaro ijtimoiy taʼminot assotsiatsiyasining ijtimoiy sohada mukammallik sertifikatini olish uchun xalqaro ko‘rsatma va yaxshi amaliyot yechimlarini o‘rganish tashkilotning asosiy qadriyatlariga kiritilgan.
Ma’lumot uchun, O‘zbekistonda yarim yil ichida 201 ming 216 nafar fuqaroga yangi pensiya va nafaqalar tayinlangan. Shundan 121 ming 620 ta yoshga doir pensiya, 15 ming 326 ta nogironlik pensiyasi, 9 ming 255 ta oilaga boquvchisini yo‘qotganlik pensiyasi va 55 ming 15 nafar fuqaroga nafaqalar tayinlandi.
Izoh (0)