Andijon viloyati hokimi Shuhrat Abdurahmonov maktab direktorlari bilan uchrashuvda 2021/2022-o‘quv yilidan boshlab a’lo baholarga o‘qigan, o‘zining xulqi va iqtidori bilan namuna bo‘ladigan maktab o‘quvchilar uchun “Viloyat hokimi stipendiyasi”ni ta’sis etish taklifini ilgari surdi. Bu haqda “Daryo” muxbiri Umidjon Mamarasulov xabar bermoqda.
Ta’kidlanishicha, Shuhrat Abdurahmonov xalq ta’limi boshqarmasi tomonidan tashkil etilgan “Direktorlar maktabi” loyihasi doirasida viloyatdagi barcha umumta’lim, ixtisoslashtirilgan maktablarning direktorlari bilan uchrashuv o‘tkazgan.
Uchrashuv davomida 2020/2021-o‘quv yilida viloyat bo‘yicha ta’lim tizimida amalga oshirilgan ishlar tahlil qilingan. Maktab bitiruvchilarining yetti yarim ming nafarga yaqini oliy ta’lim muassasalariga kirgani va bu ko‘rsatkichlar o‘tgan yilga nisbatan ortgani qayd etilgan.
Viloyat hokimi uchrashuv davomida ta’lim xodimlarining fikr-mulohazalarini eshitib, viloyatda 2021/2022-o‘quv yilini “Umumta’lim maktablarida innovatsion ta’lim, kasbiy mahorat va intellektual salohiyatni rivojlantirish yili” deb e’lon qilish, haftaning juma kunini “Ta’lim kuni” sifatida o‘tkazish taklifini o‘rtaga tashlagan. Shuningdek, o‘zining a’lo baholari, yuksak iqtidori va qobiliyati, san’at, sport va boshqa yo‘nalishlarda respublika va xalqaro darajadagi yutuqlari bilan namuna bo‘loladigan maktab o‘quvchilari uchun viloyat hokimi stipendiyasi joriy etilishini ma’lum qilgan. Biroq hokim stipendiya qay tartibda va qancha miqdorda berilishiga aniqlik kiritmagan.
Izoh (0)