Халқаро ижтимоий таъминот ассоциацияси Бош Ассамблеяси Ўзбекистон Иқтисодиёт ва молия вазирлиги ҳузуридаги бюджетдан ташқари Пенсия жамғармасининг ташкилотга аъзо бўлиш учун берган аризасини тасдиқлади. Бу ҳақда жамғарма матбуот хизмати хабар берди.
Қайд этилишича, 1927 йил ташкил этилган Халқаро ижтимоий таъминот ассоциацияси аҳолини ижтимоий ҳимоя қилиш соҳасида ягона сиёсатни амалга ошириш бўйича етакчи халқаро ташкилотдир. Ўз доирасига 160 мамлакатдан 320 га яқин миллий ижтимоий таъминот институтларини бирлаштиради. Ижтимоий соҳада қатор халқаро ташкилотлар, биринчи навбатда, Халқаро меҳнат ташкилоти, БМТ Иқтисодий ва Ижтимоий кенгаши, Жаҳон соғлиқни сақлаш ташкилоти ва соҳага оид бошқа муассасалар билан яқиндан ҳамкорлик қилади.
Халқаро ижтимоий таъминот ассоциациясига аъзоликнинг ижобий томонлари ижтимоий таъминотни бошқаришда тан олинган стандартларга кириш ва халқаро ижтимоий таъминот ассоциациясига аъзо мамлакатлар ҳудудида мигрантларнинг ижтимоий ҳимоя таъминоти соҳасидаги ҳуқуқлари кафолатини таъминлашга йўналтирилган.
Шунингдек, Халқаро ижтимоий таъминот ассоциациясининг ижтимоий соҳада мукаммаллик сертификатини олиш учун халқаро кўрсатма ва яхши амалиёт ечимларини ўрганиш ташкилотнинг асосий қадриятларига киритилган.
Маълумот учун, Ўзбекистонда ярим йил ичида 201 минг 216 нафар фуқарога янги пенсия ва нафақалар тайинланган. Шундан 121 минг 620 та ёшга доир пенсия, 15 минг 326 та ногиронлик пенсияси, 9 минг 255 та оилага боқувчисини йўқотганлик пенсияси ва 55 минг 15 нафар фуқарога нафақалар тайинланди.
Изоҳ (0)