O‘zbekistonda “Dok-1 Maks”dan 65 nafar bola vafot etgani ma’lum qilindi

Oliy sud matbuot xizmati “Dok-1 Maks” dori vositasi bilan bog‘liq jinoyat ishi yuzasidan ma’lumotlarni ochiqladi. 

Unga ko‘ra, Toshkent shahar sudining ish yurituviga S.R.P. (erkak, 1972-yilda Hindistonda tug‘ilgan, Quramax Medical MCHJ direktori), S.K. (erkak, 1982-yilda Toshkent shahrida tug‘ilgan, bir vaqtda Farmatsevtika tarmog‘ini rivojlantirish agentligi direktori va uning huzuridagi “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” DUK direktori lavozimlarida ishlagan) va boshqalarga (jami 21 kishi: Quramax Medical MCHJ va “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” DUK mas’ul xodimlari) oid jinoyat ishi kelib tushgan bo‘lib, uni ko‘rib chiqish bo‘yicha ochiq sud jarayoni 11-avgust kuni soat 10:00 da boshlanishi belgilandi.

Ayblanuvchilarning 16 nafari erkak va 5 nafari ayol bo‘lib, ularning 7 tasiga qamoqqa olish, 12 tasiga munosib xulq-atvorda bo‘lish to‘g‘risida tilxat va 2 tasiga garov tarzidagi ehtiyot choralari qo‘llangan.

Ular Jinoyat kodeksining 184, 28,186-3, 186-3, 25,205, 205, 207, 28,209, 209, 210, 211, 212, 228-moddalarida nazarda tutilgan jinoyatlarni sodir etganlikda ayblanmoqda.

Tasdiqlangan ayblov xulosasiga ko‘ra sodir etilgan jinoyatlar oqibatida 65 nafar yosh bola vafot etgan.

Hindistonda ishlab chiqarilgan “Dok-1 Maks” siropini iste’mol qilish ortidan O‘zbekistonda 20 dan ortiq bola vafot etgani aytilgan edi. Yanvar boshlarida Marion Biotech Pvt. Ltd kompaniyasining litsenziyasi to‘xtatib qo‘yilgan. Marion Biotech asoschilari Noida zavodida har xil turdagi dori-darmonlarni ishlab chiqarish uchun ikkita: Form 25 va Form 28 litsenziyalariga ega bo‘lgan.