Давлат рақами белгилари берганлик учун тўлов миқдорлари ўзгариши кутилмоқда

2023 йил 10 август куни ички ишлар вазири Пўлат Бобожонов бу ҳақидаги буйруқни имзолаган. Буйруқ иқтисодиёт ва молия вазирлиги билан келишилган.

Унга кўра, 2023 йил 1 ноябрдан бошлаб рўйхатдан ўтказиш давлат рақами белгиларини бериш, яроқсиз ҳолга келган, шикастланган ёки бузилганлари ўрнига янги рўйхатдан ўтказиш давлат рақами белгиларини беришда ундириладиган тўловлар ставкалари ўзгаради.

Ушбу тўлов миқдорлари 2011 йилдан буён ўзгармаганди.

2023 йил 1 ноябрдан тўлов миқдорлари қуйидагича бўлади:

1. Автотранспорт воситаларига рўйхатдан ўтказиш давлат рақами белгилари (РЎДРБ) учун - базавий ҳисоблаш миқдорининг 3,5 баравари миқдорида (1 155 000 сўм) — ҳозир 495 000 сўм;

2. Мототранспорт воситалари, мотороллерлар ва тиркамаларга (ярим тиркамалар) РЎДРБ учун - базавий ҳисоблаш миқдорининг 1,75 баравари миқдорида (577 500 сўм) — ҳозир 247 500 сўм;

3. Транзит РЎДРБ учун - базавий ҳисоблаш миқдорининг 25 фоизи миқдорида (82 500 сўм) — ҳозир ҳам 82 500 сўм;

4. Яроқсиз ҳолга келган, бузилган ёки шикастланган бир жуфт РЎДРБ ўрнига янги РЎДРБ бериш учун - базавий ҳисоблаш миқдорининг 3,5 баравари миқдорида (1 155 000 сўм) — ҳозир 330 000 сўм;

5. Яроқсиз ҳолга келган, бузилган ёки шикастланган бир дона РЎДРБ ўрнига янги РЎДРБ бериш учун - базавий ҳисоблаш миқдорининг 1,75 баравари миқдорида (577 500 сўм) — ҳозир 165 000 сўм.

Шунингдек:

-йўқотилган бир дона ёки бир жуфт РЎДРБ ўрнига янги бир жуфт РЎДРБ бериш учун базавий ҳисоблаш миқдорининг 3,5 баравари миқдорида ундирилади (1 155 000 сўм) — ҳозир 990 000 сўм;
-йўқотилган бир дона РЎДРБ (мототранспорт воситалари, мотороллерлар ва тиркамалар (ярим тиркамалар) учун) ўрнига янги бир дона РЎДРБ бериш учун базавий ҳисоблаш миқдорининг 1,75 баравари миқдорида ундирилади (577 500 сўм);
-РЎДРБни ўн икки ой муддатдан сўнг яна бир йил муддатга сақлаганлик учун базавий ҳисоблаш миқдорининг 1 баравари миқдорида ундирилади (330 000 сўм);
-Ўзбекистон Республикаси меҳнат органлари томонидан ногиронлиги бўлган шахсларга имтиёзли шартларда берилган транспорт воситасига РЎДРБларини бериш учун тўлов ундирилмайди.

Маълумот учун, базавий ҳисоблаш миқдори 2023 йил 1 майдан бошлаб 330 минг сўм этиб белгиланган.