Намангандаги бозорда ёнғин содир бўлди (видео)

Наманган вилояти Фавқулодда вазиятлар бошқармаси Чортоқ туманидаги бозорда содир бўлган ёнғин тўғрисида маълумот берди.

Маълум қилинишича, 5 август куни соат 03:39 да Чортоқ туман фавқулодда вазиятлар бўлимига туманнинг “Наманган” МФЙ Мустақиллик шоҳкўчасида жойлашган Chortoq Tourist Trade Center МЧЖ ҳудудидаги очиқ расталарда ёнғин содир бўлаётгани ҳақида хабар келиб тушган.

Хабарга асосан соат 03:44 да ёнғин-қутқарув экипажи ҳодиса жойига етиб бориб, ёнғин соат 04:05 да ўраб олинган ва соат 04:20 да ўчирилган.

Ёнғин оқибатида 34 та очиқ раста ҳамда 5 та ёпиқ дўконнинг 250 квадрат метр жойи, дўкон ички қисмида бўлган озиқ-овқат маҳсулотлари ёниб зарарланган. Қутқарувчилар томонидан 4 000 квадрат метр жой сақлаб қолинган.

“Ҳодиса оқибатида тан жароҳати олган ва ҳалок бўлганлар йўқ. Ҳозирда содир бўлган ёнғин юзасидан терговга қадар суриштирув ишлари олиб борилмоқда”, — дейилади хабарда.

1 август куни Бухоро шаҳар Ибн Сино кўчасида жойлашган икки қаватли савдо дўконларида ёнғин содир бўлганди. Ёнғин оқибатида тадбиркорлик субъектларига тегишли икки қаватли 15 та дўконнинг ички товар маҳсулотлари ва шифт қисми зарарланган.