O‘zbekistonda tadbirkorlarni oldindan ogohlantirmasdan yong‘in xavfsizligi talablariga rioya etishi yuzasidan tekshiruv o‘tkazish mumkin bo‘ladi

O‘zbekistonda tadbirkorlarni oldindan ogohlantirmasdan yong‘in xavfsizligi talablariga rioya etishi yuzasidan tekshiruv o‘tkazish mumkin bo‘ladi. 

2-avgust kuni imzolangan prezident farmoniga ko‘ra, endilikda davlat yong‘in nazorati organlari yong‘in xavfsizligi talablariga rioya etilishi yuzasidan tekshiruv o‘tkazilishi haqida tadbirkorlik subyektlarini oldindan xabardor qilishi shart emas.

Yong‘in xavfsizligi talablariga rioya etilishi yuzasidan bir yilda bir marta batafsil va nazorat tekshiruvi o‘tkaziladi. Yuridik yoki jismoniy shaxslar murojaatlari, OAV va boshqa manbalardan olingan ma’lumotlar asosida ham tezkor tekshiruv o‘tkaziladi. 

Hujjatda qayd etilishicha, bu yong‘inlarning oldini olish va ularningkelib chiqish sabablari va omillarini barvaqt aniqlash, bartaraf etish hamda bu borada davlat nazoratini yanada kuchaytirish maqsadida amalga oshirilmoqda.

Eslatib o‘tamiz, 29-iyul kuni Farg‘ona shahridagi to‘rt qavatli binoning yerto‘lasida joylashgan karaoke kafesida olti kishining o‘limi, yetti kishining turli darajadagi tan jarohatlari olishiga sabab bo‘lgan yong‘in sodir bo‘lgandi. 

Shu kuni Favqulodda vaziyatlar boshqarmasi binosida viloyat ishchi guruhi hamda shtab tashkil qilingandi.  Tuzilgan 25 ta ishchi guruhning har biriga 11 nafardan mutaxassislar biriktirilib, va Farg‘ona shahridagi 73 ta mahalla fuqarolar yig‘inlari hududidagi ko‘p qavatli turar joy binolarining yerto‘la qismida tadbirkorlar tomonidan tashkil etilgan savdo va maishiy xizmat ko‘rsatish  shoxobchalari, o‘quv markazlari, ko‘ngilochar servis shoxobchalarining yong‘in xavfsizligi va sanitariya holatini xatlovdan o‘tkazish belgilangandi.